碧咸襲港 子淇半億黃鑽搶鏡

「萬人迷」碧咸（David Beckham）昨午約1時抵港，據知機場閘口有多名拎住波衫的fans守候，碧咸為粉絲簽名後才登車離去。及至下午2時左右，其所乘的七人車直駛入香港半島酒店內。小休數小時的碧咸換上靚仔西裝於傍晚6時再出動，在保安及助手陪同下登上座駕直往港島區，期間有粉絲包的士追星。晚上約7時45分，碧咸的座駕抵達中環著名會所出席時裝品牌舉辦的私人晚宴，甫落車即惹來混亂。有粉絲拎波衫給碧咸簽名，他亦大方停低，全程表現親民。

而活動亦邀請了「千億新抱」徐子淇與老公李家誠、「大美人」關之琳（之之）、鄭裕彤長孫兼文化企業家鄭志剛、霍家公子霍啟山、利孝和夫人女兒利蘊珍、「九巴新抱」雷林靜怡與老公雷兆光、歌手楊千嬅與老公丁子高、楊愛瑾及老公郭永淳等。

半億黃鑽。	碧咸為粉絲簽波衫，全程表現親民。	馮詠儀（中）、鄭志剛（左）

千嬅奶奶愛球星

徐子淇與老公李家誠到達會場時，一度引起混亂。徐子淇身穿中門大開的黑色裙，十分性感，配上心口一顆估計半億大黃鑽頸鏈，極之搶鏡！而之之與好友陳栢熹一同到來，問到之之是否碧咸粉絲？她說：「唔係，我唔鍾意睇波，自己好少出嚟，出嚟見吓人。（同碧咸傾時裝經？）我鍾意佢老婆啲衫多啲。（會唔會集郵？）我好少集郵，但有朋友叫我影相留念，我係藝人都好明白。」

關之琳自言好少集郵，未必會主動埋碧咸身。	楊千嬅（右）、丁子高（左）	楊愛瑾與老公郭永淳婚後首次出席公開活動。

至於千嬅表示到場後才得悉碧咸也在場，笑言：「我會話畀佢知我鍾意佢太太設計嘅衫。（囝囝Torres都係用球星名﹖）係，奶奶改，因為佢鍾意足球。」至於將來生第二胎可會再用球星名﹖丁子高笑言﹕「我家姐個女叫Chelsea（車路士）。我都係碧咸粉絲，但就未見過佢。」

相隔13年再見偶像

而自認是球迷的霍啟山則表示大感榮幸：「係03年安排過皇家馬德里球隊嚟香港（當年碧咸為該隊球員之一），所以我係13年前已經識佢，今次係第二次見。」另手持紅簿仔的雷林靜怡，解釋是專程拿來給碧咸簽名：「大仔係佢粉絲。（喺現場集郵？）唔會啦，我係幫仔仔之嘛！」

文：名人組　

攝：追蹤組