Bobby忙造人 拍劇要諗諗
歐陽震華（Bobby）與胡楓（修修）首次結片緣便打成一片，修修更搞笑「投訴」Bobby教壞他！談到無綫明年慶祝50周年，Bobby承認獲斟拍重頭劇，但笑說：「要睇時間，我都有好多嘢做，老婆又要生仔呢！」
歐陽震華昨日與胡定欣、呂慧儀及修修等宣傳新劇《一屋老友記》，當他與定欣Chok住推門出場時，差點推倒剛巧站在門邊的修修及呂慧儀，幸有驚無險，百厭的Bobby更與呂慧儀你追我逐放笑彈。
事後Bobby孖住定欣受訪，剛巧修修路過，搶着向記者推介劇集，三人異口同聲表示對收視有信心，定欣更指Bobby是福將，要沾沾對方的旺氣！原來他們加上羅蘭是首次合作，由於相處愉快，Bobby希望Encore：「今次我跟修修學到好多嘢，等佢提名最佳男主角，我哋呢啲提名男配角得喇！」修修即說：「我成世人冇乜衰嘢，但跟Bobby就學到喇！（例如呢？）講不文嘢同粗口囉！」Bobby聽罷笑說：「你成世人都好衰，衰靚仔呀！」
呂慧儀唔做虎媽
Bobby又透露無綫高層杜之克有意邀他回巢再拍劇：「明年無綫50周年，佢哋度緊開套50集長劇，詳情未知，淨係問我有冇期。」問到是否感興趣，他開玩笑說：「有，但要睇時間，我都有好多嘢做，老婆又要生仔呢！」
至於呂慧儀重提在節目《沒有起跑線？》中被幼稚園生求婚，她笑說：「當時唔識反應，我個仔第時返學就唔可以亂求婚！我唔係虎媽，想幫佢減輕壓力，只幫佢報咗兩間幼稚園，最終揀咗近屋企嗰間，唔想佢舟車勞頓。」
文：影視組