判刑前最後工作 羅鈞滿：點都要面對！
藝人羅鈞滿上月被判醉駕罪成，明日判刑。曾被裁判官指「坐得監」的他，昨日出席判刑前最後一個公開活動時坦言：「心情點都要面對。」並揚言已得到教訓，痛失新劇角色！
藝人羅鈞滿醉駕罪成，案件將於明日判刑。昨日他與無綫藝員張智軒等，在鴨脷洲出席《625擁有愛擁抱愛》活動，落力為長者獻唱。提到裁判官指他的酒精呼氣測試含量高出法例3倍，根據案例「坐得監」，問到判刑前心情如何？他說：「心情點都要面對。（上庭前有咩準備？）經理人會陪我去，成年人做錯事，最驚家人擔心，家人覺得今次係個好教訓，不幸中嘅大幸係冇整親人。」問到以後會否減少飲酒？他說：「我不嬲都少飲，係應酬先飲。（唔再去應酬？）選擇性出席。我唔係追酒飲嘅人，唔知點解人哋對我印象係咁，我飲一杯啤酒就面紅！」
被換角 冇新Job
提到無綫方面的反應，羅鈞滿指公司待判決後再作工作安排：「我同公司保持聯絡。（今次係判決前最後亮相公開活動？）係。」談及於新劇《迷》的角色確定被換角，他表示會吸取教訓：「監製本身準備同我傾角色，依家要換角，對我係個好教訓。（因為醉駕而換角？）擔心我影響拍攝過程，我都明白。（擔心之後冇劇拍？）冇得擔心！（手頭上有冇劇？）冇，但我做《勁歌金曲》主持就仲有開工，希望件事快啲過去！」
同場的張智軒則重提早前與朱晨麗的緋聞，有家室的他強調對方是同事，更笑指家人把緋聞當笑料。
文：影視組