洪永城睇好有優勢
洪永城（Tony）有份為今屆港姐擔任評審，對於無綫招攬「星二代」參選港男，他認為這批參賽者會有優勢：「因為佢哋見慣大場面，有呢個經驗，真正選嗰時會淡定啲，口才方面應該都有着數，始終由細至大都接觸呢個圈嘅人。」
而他與唐詩詠昨日首次以情侶檔出席活動，席上不時打情罵俏，Tony更出口術讚女友認路一流，不時遙控他到達目的地，詩詠笑說：「係你先有咋，都唔明你點解唔睇地圖！」Tony即賣口乖笑言是想聽到女友的聲音，氹得詩詠頻頻甜笑！談到麥玲玲批唐詩詠今年有結婚運，明年有生仔運，詩詠笑說：「太快，我冇呢個計劃。」Tony卻自爆：「我哋一齊之後嘅計劃都有，但未係好詳盡，有咩會公布畀大家知！順其自然，總之依家舒服，各方面都舒適就OK！（認定詩詠？）梗係啦！」