無綫省靚港男招牌 鎖定星二代
《2016香港先生選舉》與《香港小姐選舉》今年齊齊競選，近年搞得有聲有色的港姐除了有高挑索女外，參賽佳麗的學歷亦一年比一年高，今年的參賽者質素甚高，港男方面亦想盡辦法，吸引高質素參賽者與港姐睇齊！除了向港姐取經，在高質港姐「產地」加拿大吸納參賽者外，同時又鎖定「星二代」為招募對象，當中包括曾華倩的「飛魚」兒子林浩賢、「美魔女」趙雅芝兒子黃愷傑、程可為姪仔楊權澤及胡楓的外孫呂衍峰等！
多倫多擸「種子選手」
TVB早前與多倫多及溫哥華單位合辦《型男家族》選舉，由多倫多代表鍾君揚奪得冠軍，他將獲TVB安排機票來港參選，成為港男首位「種子選手」。在芸芸參選者中，同樣來自多倫多、甘草演員程可為的姪仔楊權澤屈居亞軍，雖然未獲TVB送出機票參選，但他亦下定決心在娛樂圈一展所長，決定自費回港參選港男！對於姪仔有意參選，程可為說：「權澤佢跳舞天分好高，喺大學有同來自俄羅斯嘅女同學齊齊組舞團，都參加過好多比賽攞獎，我都對佢有信心！」
胡楓撐乖孫入行
其實不少「星二代」都條件出眾，當中資深藝人胡楓的外孫呂衍峰一直有意加入娛樂圈。現年30歲的衍峰在加拿大任職文員，早年曾在胡楓的80歲演唱會中亮相，更與公公同台獻聲，即使面對數千人亦毫不怯場！問到會否支持外孫參選港男入行？胡楓說：「佢喺演唱會面對咁多人都唔怯場，真係好有潛質入演藝界，我都好想佢加入娛樂圈！雖然我唔知選港男嘅細節，但如果佢參加，都係一個好途徑。」至於趙雅芝與黃錦燊的兒子黃愷傑現時已成為演員，倘若參選港男絕對會被睇高一線，問到會否考慮參選？愷傑卻說：「一直都有留意港姐同港男，自己都有朋友參選，係一個好機會，不過我就未必參選，因為最近喺內地嘅時間比較多，嚟緊要拍真人騷，要將呢個機會留畀其他人啦！」
此外，曾華倩的兒子林浩賢就讀名校喇沙書院，更是本港泳界有名的「飛魚」，今年17歲的他符合參選條件，若報名參選，極有機會跑出！
文：影視組