Rosemary瑜伽之道 促進夫妻情

延遲生B 旅行去到盡

Rosemary與Jason於印度完婚後，即進行馬拉松式蜜月旅行。以為一直恨生B的二人會開行Turbo造人，但事實剛剛相反，他們旅行後竟太過享受二人世界，決定延遲生B大計。

「我哋去咗好多地方旅行，真係好開心。如果有咗小朋友，我哋就唔可以毫無顧慮咁去旅行，我哋想過吓二人世界先。其實我哋曾經諗過咩都唔做一年，周圍去旅行，喺生BB之前，去到夠為止。因為一旦生咗BB，就會好一段長時間唔可以去旅行。

同埋我哋要求好高，想畀最好嘅嘢BB，所以依家努力儲錢，為將來作好打算。喺香港要養小朋友一啲都唔容易，我啲朋友一大肚就即刻計劃搵定學校，真係好大壓力。我同Jason依家對生BB都抱順其自然態度，不過Jason曾經講過唔想太老先生小朋友，因為湊得會辛苦啲，我有將呢句說話放喺心上。」

這些高難度瑜伽動作，絕對難不倒Rosemary。	Rosemary與老公Jason雖然恨生B，但想先享受一下二人世界。	Rosemary現時要兼顧事業、家庭與學業，忙得不亦樂乎。

Rosemary每次發脾氣，都會先深呼吸，盡量避免跟丈夫吵架。	Rosemary去年在印度結婚，享受異國婚禮。	遊艇做得

一發脾氣 即刻深呼吸

正所謂「嫁雞隨雞」，Rosemary嫁給Jason後，即協助對方於世界各地籌辦文化音樂節，減輕丈夫的工作負擔。二人在工作中互相磨合，增加夫妻間的默契。

「我好開心可以同佢一齊做嘢，可以一齊去唔同地方搞文化音樂節，好似喺泰國嘅Wonderfruit、拉斯維加斯嘅Further Future、紐約嘅Robot Heart等，去好多旅行，寓工作於娛樂！不過喺籌備嘅過程當中，我哋都有意見不合嘅時候，我哋互相磨合緊，學識聽大家意見，因為大家都係為咗件事好。

我每次想發脾氣嗰陣，Jason都會話：『乜你唔係Yogi（瑜伽修行者）嚟(口架)咩？』Yogi的確應該有個好平靜嘅心境至啱，搞到我唔知好嬲定好笑。我依家每次覺得嬲嗰陣，都會叫自己深呼吸，同埋盡量唔好即時爭執，休息一陣，等大家冷靜吓先。同埋要時刻記住要溝通，而唔係要嗌交。」

對症下藥 老爺做白老鼠

Rosemary近年全身投入瑜伽教練工作，並正在修讀為期一年的「人生教練」遙距碩士課程，更找Jason的家人做「白老鼠」，助他們擁有健康人生。

「我依家有私人教瑜伽，主要係教朋友同朋友嘅朋友，都係經朋友介紹，愈識愈多朋友，好開心。同埋我依家上緊一間喺紐約大學搞嘅遙距碩士課程，上完個課程後，我可以成為人生教練，從飲食習慣、運動、心理質素等唔同方面去幫助人，令其他人可以得到一個健康人生。

個課程學費要6,000美金（約46,800港元），全部都係網上上堂，我每星期要交Paper，所以真係好忙！同埋我需要做case study，所以我搵咗Jason嘅爸爸同埋細妹做我嘅研究對象。我會了解佢哋嘅日常生活習慣，搵出令佢哋身體或精神上有問題嘅地方，再對症下藥。我讀呢個課程，主要係因為我對呢方面好有興趣，我好想幫到我身邊嘅朋友，但短期內我暫時唔打算開健康中心之類嘅舖頭，不過唔排除將來會喺呢方面發展嘅。」

Yoga無疆界

熱愛旅遊的Rosemary，到訪世界各地都絕不偷懶，天天練習瑜伽，並不時在社交網站大晒索爆瑜伽照，地點包括海邊、山上、天台、泳池邊等，完全不受地域所限！

文：龔凱欣

攝：吳文聰

髮型：Tim Chong @ La Biosthetique

服飾：Pure Apparel