猷君拖混血新歡歎紅酒

早前於波士頓麻省理工大學畢業的何猷君，以三年時間完成四年課程，被喻為人生勝利組的他，學業叻，愛情運亦強，身邊女伴換不停，去年猷君撻着新加坡富二代Kimmy，兩人經常高調往世界各地旅遊拍拖，隨着Kimmy往韓國做模特兒，表示要將戀情低調後，兩人似乎愈行愈遠，猷君畢業之時亦不見Kimmy現身，原來兩人已悄悄分手，猷君亦有混血靚女新歡相伴。

調虎離山計

大前晚8時多，猷君與長髮、樣貌標致的新歡現身大坑歎意大利菜，兩人相對而坐，邊飲紅酒邊談心，情到濃時猷君更深情地捉住女友手仔傾不停，新歡亦不時甜笑。食至10時多，猷君和混血新歡並肩步出，只見數杯落肚的猷君飲到面紅紅，記者上前拍照，兩人即時一愕，更火速折返餐廳，15分鐘後猷君獨自步出，被問到女友時，他笑笑口說：「走咗啦！」隨即登上七人車，意圖為女友引開記者，未幾記者見四太名下的房車駛至，混血女友尷尬地在餐廳職員陪同下步出，面對閃光燈的她更驚到以衫包頭，匆匆上車直往猷君所住的香島道豪宅。

何猷君	何猷君與新歡歎紅酒。	Kimmy與何猷君已成為過去式。

距離大分手

猷君被問及新戀情時大方承認，透露最近才與對方開始發展，問到與Kimmy分手原因，他說：「分手因為工作原因，一個喺韓國，一個喺美國，所以距離大咗，分開咗差不多兩個月。（係咪你提出？）和平分手冇話邊個提出，距離大咗自然會分手，大家都係成年人。」四太梁安琪對猷君約會混血靚女新歡一事回應說：「佢咁多朋友，唔知真定假，佢話係就係。」而猷君舊愛Kimmy則不作回應，寄情模特兒工作的她不時上載於韓國及泰國等地的工作照，身在泰國的她於ig發放工作期間化妝、泳池拍照以及去四面佛的照片，心情似乎相當不錯，沒有受失戀影響。

Kimmy上載忙於做model的工作照。	猷君與新歡歎完意大利菜，出門口見記者即掉頭走。	混血新歡走後門，仲要以衫笠頭避鏡頭。

文、攝：追蹤組