寶珠阿嗲有壓力要Warm up！
粵劇名伶陳寶珠及梅雪詩（阿嗲）昨日到電台宣傳粵劇《牡丹亭驚夢》，此劇將於八月十五至十六日、十八至二十一日，再度公演六場，將於下周一公開發售。她們表示又孭了很多飛債。講到再度公演，心情可會比上次輕鬆？她們坦言：「反而仲緊張，因為希望做得好過上次，所以都有壓力，自己畀自己壓力，同埋抖咗成兩個月，要Warm up番。（師傅白雪仙有冇畀建議？）有，都要排畀師傅睇，好多嘢要修改，不過七月先會排。」她們亦謂師傅屆時應該會來捧場，為她們打氣。
睇千嬅個唱
訪問期間主辦單位送上滋補湯水給她們享用，又找了天后楊千嬅拍片支持及祝賀演出成功，兩人大感驚喜。阿嗲謂之前有看過千嬅的演唱會：「得閒都鍾意去睇吓，不過唔識唱佢啲歌。之前都有睇過郭富城嘅演唱會，有好多機械。（佢八月開騷會唔會睇？）唔撞我哋演出嘅話都想。」雖然平時唱開粵劇，但阿嗲亦坦言喜歡聽時代曲：「例如羅文、徐小鳳，都有睇好多千嬅嘅戲。」
講到拍戲，問阿嗲可會想拍戲？她即耍手：「我咁嘅樣，又唔識做，仲要時裝，你畀個輪椅我坐住都唔掂。（如果套戲有粵劇戲中戲？）粵劇我鍾意喺舞台，雖然我都叫做拍過三套戲，但拍戲好難，因為感情唔連貫，明明喊緊，但下個鏡頭就要笑，不過寶珠姐拍戲就好叻。」問到縱橫影壇多年的寶珠姐現時可有興趣再拍戲？她即落閘：「唔想，因為追唔到，依家演員拍戲好辛苦，以前我哋舒服好多，依家觀眾要求高咗好多，不過我都係超級戲迷同電視迷。」
文：音樂組