蔡思貝吳啟華開工食鮑魚

蔡思貝在無綫新劇《純熟意外》中角色「升呢」，由過往的初生之犢轉為飾演處事穩重的保險調查員，劇中除了與黎諾懿有感情線，還與吳啟華有段曖昧關係，她坦言初時與吳啟華合作有點壓力，但熟稔後又覺得對方玩得兼有紳士風度，毫無前輩架子，並感激對食物相當講究的啟華帶挈她開工有鮑魚吃：「平時開工食飯盒多，但啟華哥總會搵間餐廳食飯，有次仲有鮑魚食，因為啟華哥粉絲整咗啲鮑魚畀佢，佢請埋我哋食。」

浪漫父女戀OK

思貝的聲線曾備受批評，幸得啟華教她用聲，拍鬧交戲才不致嗌破喉嚨，啟華還提議她去學唱歌：「依家跟老師學緊，學咗幾堂覺得用氣好咗，講嘢冇咁易喉嚨痛。」問到現實中可會接受與年紀差距這麼大的男士拍拖？她說：「我係浪漫主義者，戀愛冇限制，啱就可以，但現實未試過，要講緣分。」

思貝感激啟華教路，拍鬧交戲唔使嗌破喉嚨！	思貝新劇轉行成熟路線，令人耳目一新！	曾與多位前輩合作的思貝自覺演技大有進步！

檢討演出方法

對於有別過往的「新丁」形象，思貝坦言飾演成熟、踏實的角色更加舒服：「做新人角色情緒要好高漲，今次可以唔使用咁多能量。」每個演員對所演的角色總有不滿之處，思貝亦不例外：「如果有機會再演新人可以做得好啲，可以用其他方法，唔令人煩擾，等觀眾睇得舒服啲，依家學識角色可以有唔同層次，可以有其他諗法。好似《衝線》同羅仲謙、沈震軒嘅關係做得好模糊，令觀眾覺得兩段感情戲差不多，其實可以做得分明啲。」

文：影視組　

攝：唐豁莊