陳婉衡低價搶騷 阿雪嬲豬
無綫昨日在將軍澳電視城舉行「TVB Amazing Summer」大型記者會介紹暑期檔節目，歐陽震華、張秀文、孫慧雪、陳婉衡等總動員出席，重點節目包括劇集《一屋老友記》、《超能老豆》、《城寨英雄》、曾志偉主持的新遊戲節目《我愛香港》及許廷鏗、胡鴻鈞、黃翠如的《反斗紅星冇暑假》將在暑假推出。
陳婉衡被指以低價搶張秀文及孫慧雪的水着騷，剛巧三位當時人同場，三女拍照時交足戲，搞笑地扮面左左來回應。「新咪神」陳婉衡強調不清楚身價，她說：「我喺化妝間撞到阿雪先知有新聞，價錢詳情唔清楚，由公司安排同處理，相信公司會傾個合理價錢。」問她會否擔心激嬲張秀文及孫慧雪﹖陳婉衡說：「本身同佢哋識，都幾friend，唔會視為競爭對手。」
Bobby省招牌
被指要求多多遭棄用的孫慧雪說：「冇諸多要求，唔接係因為知道係商場騷，自己冇信心。之前只試過着一件頭加平腳褲行騷，三點式就唔好喇，商場好多人影相。」她又不忘推介將終極性感留給她7月書展推出的寫真。張秀文也否認有開天殺價接騷，強調自己是價廉物美。
無綫「福將」歐陽震華（Bobby）對《一屋老友記》收視有信心，他說：「以前就話成也Bobby敗也Bobby，今次有修哥（胡楓）得啦，今次有佢睇住細佬。（靠你套劇打仗？）打咩仗，有仗打咩？如果有10點我着三點式、過15點游冬泳、20點請食飯，哈哈。」講完笑，Bobby反問記者現在劇集收視多數幾點？他得悉20多點後笑說：「我上套都講緊望有30點，依家講20幾點，咁就好喇，以後唔使有壓力，過唔到初一，十五都過到啦，我仲諗住30點省吓招牌。」
文：影視組