城城打造智能舞台 掟5,000萬玩大佢
天王郭富城相隔三年再「舞臨」紅館，將於下月21至28日舉行《郭富城舞林密碼世界巡迴演唱會2016香港站》。城城昨日舉行個唱記者會，身穿黑色花恤衫的他跳舞Chok爆出場！期間，他宣布加開9月1至4日四場，又即場獲贊助商及主辦單位送上皇冠及LONGINES手錶。
受訪時，城城透露為超越自己及打破規限，特別打造一個紅館前所未有的超智能舞台，可以滿足到山頂位置的觀眾：「好似一個黑洞空間走出嚟嘅黑舞士，好有神秘感覺，每個角落都希望可以好清楚睇到個舞台嘅變化，希望觀眾入嚟睇到忘我，係冇時間嘅規限！」談到今次豪擲5,000萬元製作費，城城笑言比以往的演唱會貴，因要配合大量高科技。
城城又指今次同樣加插安全而刺激的高難度動作，提到曾於個唱受傷令韌帶撕裂，會否怕影響表現？他解釋：「依家跳舞嘅風格係可以配合到，唔需要好似以前咁多凌空轉圈嘅動作，反而仲勁咗！」問到會否怕出現黃牛黨？城城自言太忙兼顧不了，只能交給工作人員負責，現時連拍戲、化妝都聽着音樂。
女友撐場？睇時間啦！
至於是否沒有時間拍拖？城城甜笑說：「一直都係專注工作，對方會理解，希望大家都拍住拖嚟睇我演唱會！（叫女友方媛嚟睇咪可以拍拖？）睇時間啦！佢都籌備緊自己嘅服裝品牌。」
文：音樂組