何韻詩街頭Free唱 千人熱住撐
歌手何韻詩早前因與法國化妝品牌Lancôme發生風波，以致品牌單方面取消原定昨日舉行的音樂會，但她集合各小商店及歌迷之力，令原本「胎死腹中」的音樂會「翻生」，昨日吸引逾千市民逼爆普慶坊聽歌，阿詩感動高呼大家是「有種的香港人」！
何韻詩「被取消」的音樂會昨日「翻生」，與原定計劃一樣選址上環普慶坊舉行，並改名為《有種的漂亮The Beauty of WE》，吸引逾千人逼爆整個普慶坊。阿詩以小店門口作舞台，而前來支持的市民則坐在店前的馬路或對出的球場，連看不到她的「核心外圍」轉彎位都逼滿人，但全場秩序良好。
阿詩開騷前先接受訪問，當中包括外國傳媒，她說：「音樂會被取消後，好多小商戶聯絡我，叫我繼續搞，四方八面嘅單位都伸手支持我，我好感動！唔係單純我一個人，大家都好上心，大家嘅援手我都應接不暇。」並指音樂會是以個人力量完成：「唔係任何單位或團體，其實要做唔需要依靠大財團，自己一樣可以做到。」
網上遭恐嚇：我唔怕
問到品牌方面可有再回覆？阿詩坦言：「一個星期前已經放棄咗追問，當然本身嘅酬勞係要處理，佢哋單方面取消，佢哋係需要履行承諾。」她坦言事件後還有其他品牌曾接觸她，但最終在很多因素下沒有下文。至於有否預料到有逾千人捧場？她說：「我冇預，因為係免費公開活動。（事前有冇向有關方面申請？）有同警民關係科知會一聲，不過我只係喺店門口唱歌，出面啲人可以行來行去，我覺得香港人好有質素，唔會做成任何混亂。」對於網上有人聲稱會開槍恐嚇她，她說：「啲言論可能大家唔覺得係真實世界，但有時講嘅嘢都要負責任，好多人都叫我小心啲，但自己光明磊落，我唔怕！」
笑老竇衝動
而音樂會開始時，阿詩說：「多謝你哋嚟到呢度。」觀眾即發出歡呼聲，她續說：「你哋唔好一開始就搞喊我，多謝你哋嚟，有種嘅香港人。」除父母及哥哥外，好友黃耀明亦有現身支持，阿詩更抵死地說：「除咗你，冇人敢靠近我，亦冇人敢靠近你。」之後兩人相擁抱抱。適逢父親節，阿詩不忘感激父親：「上星期佢好衝動，去其他人平台留言，嚇死我，我即刻去Delete啲留言。有啲父母好擔心仔女衝得太前，我想講我仲擔心我老竇衝得太前。」她最後以歌曲《是有種人》為約個半小時的音樂會作結。
文：音樂組
攝：鄭家俊