宋仲基榴槤食到嘔 光洙分甘同「臭」

男神宋仲基的香港見面會昨晚8時許開鑼，由DJ藝人森美擔任主持，宋仲基自爆抵港後，前晚曾到蘭桂坊酒吧，他自言成年後首次外遊便是訪港，搭過雙層巴士及山頂纜車，又跟森美學講廣東話：「你壞人！」場面搞笑。他自爆鍾意食豆腐，並用普通話讚港迷「完美」，談及理想型時，表示喜歡聰明、善良及說話細聲的女人，台下粉絲大嗌「宋慧喬」，他即以普通話讚喬妹漂亮，又自言不會太強桿、性格較木獨，但會照顧女友。

泰國遊分房瞓

宋仲基即場抽出5名粉絲重演《太陽》經典場面，自爆劇中最浪漫是接吻場面，而最多NG則是幫喬妹紮頭髮的一幕，其間與女粉絲互貼心心貼紙，令女方激動落淚。其後光洙登場，宋仲基自言二人一星期傾一次電話，又爆光洙客串《太陽》時勁NG，光洙即耍手擰頭否認。提到二人曾一起去泰國旅行，但澄清是分房瞓。玩完拋波及鬥雞遊戲後，宋仲基抽中食榴槤，卻食到吐出來，之後親自餵光洙食，而玩輸遊戲的他被罰要戴上長假髮，他遂挨實光洙的肩膊合照。

王祖藍驚喜現身

除了與光洙即場合唱一曲，宋仲基亦獲金宇彬、趙寅成及金鐘國等好友錄短片打氣，他演唱陳奕迅的國語歌《好久不見》，並向粉絲送曲奇。另外，曾跟宋仲基錄影內地節目《奔跑吧兄弟》的王祖藍驚喜上台，而雷頌德的太太及徐濠縈亦有捧場。

文：外娛組