泳兒睇風水搬入招財屋
前晚「2016英皇新秀歌唱大賽總決賽」順利舉行，一眾英皇歌手泳兒、洪卓立（Ken）、鍾舒漫、羅力威等亦有現身撐場，並向一班參賽者分享比賽心得。8位參賽者經過三個回合的唱歌比試後，最終由5號參賽者何嘉穎成功脫穎而出奪得冠軍，獲英皇娛樂行政總裁吳雨頒發「金咪大獎」及歌手合約一份。
恨同張敬軒合唱
曾參加無綫歌唱比賽節目《超級巨聲4》的何嘉穎表示從沒想過會得冠軍：「我係抱住盡力嘅心情去唱，喺天時、地利、人和下，突然攞咗呢個冠軍，所以心情都好緊張，依家都未平復到。」問到最想與哪位師兄、姐合作？何嘉穎透露自己的偶像就是師兄張敬軒，希望有機會與對方合唱。
泳兒母親去年底中風入院，問到母親的最新情況？她說：「之前因為腦壓嘅問題就剝咗個頭骨落嚟，前幾日就放番喇，呢個月真係好多嘢好憂心，但好彩都算順利。」而早前表示被業主迫遷的她透露已找到新房子，更特意擇了時辰入伙及拜四角：「風水師都讚我間屋very good，佢話呢間屋可以搵到錢。（結埋婚？）儲到錢先講下一步啦！」Ken被問到可有留意女友湯怡在劇集《瑪嘉烈與大衛系列 綠豆》的演出？他就大賣口乖讚對方靚女及演得好：「我覺得佢出鏡太少囉！（咁要加激情戲？）我得閒！」
文：音樂組
攝：唐豁莊