貝安琪質飽飯桶 王嘉慧大開食戒
名模貝安琪（Ankie）及王嘉慧（Jessica）早前到泰國拍攝旅遊特輯，首次結伴出Trip的她們一見如故，玩勻各類運動。Ankie笑言每餐都會為「飯桶」Jessica準備兩碟飯，對她照顧周到！
貝安琪與王嘉慧早前應吉隆坡電視頻道Life Inspired及泰國旅遊局邀請到當地拍攝特輯《Lady's Journey》，兩人前往多個城市享受美食及歎Spa，又挑戰各類運動，發掘當地動與靜的魅力。
潛水最寫意
她們指旅程有不少難忘經歷，並配合特輯其中一個主題「挑戰潛力」提升技能，Ankie說：「我哋都係第一次打高爾夫球，都打得OK喎！」Jessica亦說：「有晚我哋要踩單車，我本身唔叻，開頭仲以為可以踩3個轆！Ankie以前係踩單車返學，所以踩得好叻，好在兩個鐘後我終於踩到，係好大嘅進步！另外，我練到喺海中心唔用救生衣潛水！」Ankie笑言潛水過程相當寫意：「好開心！見到好多魚喺身邊游來游去！」
拉筋有秘訣
相識不久的兩人一見如故，更互讚可愛，Jessica讚Ankie搞笑樂觀，Ankie則笑指Jessica充滿活力。兩人又趁機研究拉筋心得，Jessica說：「我玩咗跆拳道好多年，啲筋算鬆，但有啲位都拉唔到，Ankie擅長瑜伽，會畀啲建議。」
提到美食，Ankie與Jessica一個食齋，一個嗜肉，但同樣食到心頭好。Jessica大讚泰國海鮮及冬蔭功冇得頂，Ankie則說：「呢度有好多美味嘅素食，令我呢啲齋食者一樣好滿足，尤其係水果，真係好味到爆！」自認「飯桶」的Jessica每餐都要吃兩碟飯，笑言旅程中多得Ankie照顧，Ankie笑說：「一定要確保佢面前夠飯，否則佢會唔開心！」
文：影視組
攝：張福宏
場地：MO Bar