阿倫 娜姐捱眼瞓撐法國 Kay問乖仔攞料
萬眾期待的2016歐洲國家盃周六凌晨3時在法國開鑼，第一戰由法國對戰羅馬尼亞，譚詠麟、謝安琪（Kay）及周秀娜都睇好法國隊！正在「放大假」的Kay笑言要向8歲的球迷兒子「問功課」，阿倫明言不介意捱夜睇波，周秀娜更揚言要死守香閨，絕對不會錯過任何一場賽事！
足球界盛事2016歐洲國家盃將於本港時間周六凌晨3點開鑼，揭幕戰由東道主法國迎戰羅馬尼亞。提到圈中的「足球之星」，實在非明星足球隊的發起人譚詠麟（阿倫）莫屬，他揚言6、7月會守在電視機前追看凌晨直播，對於揭幕戰，他大讚法國隊的攻力不錯，後生可畏！他自爆每逢有足球盛事都會追看，更多次飛抵比賽現場睇波：「不過今年去唔到，因為要籌備演唱會去唔到法國。年頭做完溫拿個騷，我個巡迴演唱會要繼續舉行，所以6、7月都行唔開，只可以每晚睇直播。」提到睇波通常要捱更抵夜，他笑言睇夜波絕對冇難度：「因為我40幾年嚟都習慣每日瞓四個鐘，只要嗰四個鐘係深層睡眠就得，瞓醒就會好精神！」
讚老公踢波扭得
樂壇天后謝安琪亦趁歐國盃大講波經，她自言對足球一竅不通，囝囝張瞻卻熱愛足球，更在車路士足球學校學踢波，所以不時向乖仔請教心得。仍在初學階段的Kay在揭幕戰中睇好法國隊，因為法國隊人才輩出，她說：「我知施丹退役前係法國隊，我個仔都識呀，有個球員叫保羅普巴！我睇之前會做功課問吓阿仔『保羅普巴有咩叻呀？』阿仔話我知佢係好有爆炸力嘅黑人球員。」
Kay閒時都會去旁觀小朋友訓練腳法，久而久之開始留意到踢波有不同踢法及入波策略，她說：「變咗我都好有興趣睇波，依家我有本錢啦，我放緊大假，係全港最有本錢睇波嘅人！」她透露囝囝最愛英格蘭，會睇英超球賽：「佢返到學校會同同學仔講波，好似好成熟咁。佢話英格蘭都有啲幾勁嘅前鋒，例如朗尼咁，我都識朗o架！」問到家中另一個男人張繼聰又如何？她指老公張繼聰提起踢波就也文也武，更曾加入青年軍及香港體育學院，笑言老公的隊友都讚阿聰扭波時「好扭得」！
文：音樂組