三年抱三要抖抖陳茵媺：一定會復出
陳茵媺（Aimee），上月終於追女成功，為老公陳豪（阿Mo）三年抱三，視寶貝女Camilla為小公主。近日Aimee頻頻在社交網上載小公主相片，並留言：「忍唔住share多一張初生相……自從公布消息後，醫生後來提醒我BB出世體重是足足8磅的（不是7磅）。一個星期後變咗9.5磅。依家一個月大應該有12磅呀！係咪應該叫小公主做小豬豬呀？Haha!I love my little ballerina! 」
Aimee昨日受訪時笑說：「小公主喺27號滿月啦，一家人簡簡單單食餐飯。因為阿Mo比較忙，仲拍緊嘢，成日都開通宵，而自己湊住三個都好攰，需要好多精神。（復出？）坐埋月先，其實我對復出都仲好興奮，但首要係休養身體先，畢竟連續生咗三個，要照顧吓身體同三個公主王子先，一定會復出，因為真係太熱愛演戲。」
