FFx「走音」騷對空櫈自High
憑MV中甩Beat、甩舞、甩詞而為人認識的MK女子組合FFx，前晚於旺角麥花臣舉行首個售票演唱會，場內3500個座位，卻只得寥寥約300名觀眾，場面慘淡，最詭異是四女竟向空無一人的「山頂區」打招呼，騎呢又爆笑。
成員Shirley、Ceci、Mizaki及Christy出動短裙、熱褲、露腰晒腿騷性感，演唱《Sugar Baby》亦貫徹作風繼續甩Beat狂走音，更「唔難唔唱」，挑戰選唱林憶蓮的《至少還有你》及Beyond的《喜歡你》，結果不斷走音，幸好台下一眾男粉絲仍睇得投入，不時走到台邊瘋狂拍照及尖叫。
四女亦識做踎低於台邊與男粉絲握手，期間露出打底褲，之後又索性走落台與粉絲拉近距離，期間Ceci竟High爆地向「無人之境」山頂觀眾席說話：「山頂嘅朋友你哋落咗嚟未呀？嗌大聲啲！」
一成都坐唔滿
事後FFx受訪，曾聲稱門票在一小時內售出1400張的她們，事實卻得300名觀眾，不足會場座位的一成，Christy解釋：「就算睇番上網$280同$380嘅飛已經賣晒，其實啲飛有八成係贊助商要咗，我哋負責專心練舞同唱歌，賣飛嘅嘢交番畀公司。」Mizaki則說就算得只一位觀眾都會做到最好。
文：音樂組