麥德羅挑肌王維德開騷玩露股？
80年代被封「舞王」的麥德羅與演員出身的王維德，組成「好德兄弟」將於6月在九展舉行演唱會，更預告會脫衣爆肌，他們笑說：「冇8舊腹肌都要有6舊。」為配合夏天來臨，邀請了前港姐莊思明做嘉賓，他們笑說：「莊思明選港姐有泳裝表演，咁我哋都可以着泳褲。」王維德大爆麥德羅提議穿T-back上台，麥德羅笑說：「半T-back，我見過有牛仔布熱褲露半個pat，好性感！」
為演唱會兩人不停加操，更戒掉澱粉質控制食量，麥德羅笑說：「好陰功，唔准食飯。」兩人會互相監督，若然被發現偷食，要罰款一百元捐給今次演唱會捐助的慈善機構，王維德說：「仲要打屁股，佢鍾意飲兩杯，酒精卡路里好高，唔畀佢飲。」談到今次合作，王維德說：「我哋一凹一凸好夾，佢成個大細路，成日周圍走，我要捉佢練歌、排舞。」麥德羅說：「有人逼吓我，我咪再努力啲。」他們承認演唱會有壓力：「票房都有，又要記歌詞又要記舞。」麥德羅稱為演唱會兼任舞蹈、武術指導，王維德就做形象指導，包辦演唱服飾，連髮型都自己操刀。