周嘉莉揮低陳嘉桓得寵做一姐

陳嘉桓、周嘉莉與同門師弟阮頌揚早前到西樵山國藝影城拍攝婚紗宣傳相，由他們的經理人公司老闆冼國林親自操刀。一向深得師傅冼國林疼錫的周嘉莉，於今次拍攝中盡顯地位，她不但獲冼國林親自挑選希臘女神靚裙，又獲教如何擺靚甫士，對於厚待周嘉莉，冼國林則笑着否認偏心：「唔係，大家無分彼此，只係咁啱條裙啱佢。」

做一日女神

對於獲師傅給予一條希獵女神靚裙着，嘉莉亦讚不絕口，笑言：「師傅話畀個機會我做一日女神啊！其實今次師傅做攝影師，我有百分百信心，之前拍過嘅微電影，都係師傅操刀，我成日話人哋就真人靚過上鏡，佢（指冼國林）就影到我上鏡靚過真人！」

陳嘉桓想在外國搞婚禮。	周嘉莉和阮頌揚在烈日當空下影婚紗宣傳相。	陳嘉桓賣口乖話好鍾意今次拍攝的婚照。

曬燶變燒豬

由於拍攝時間為兩日，而兩日都撞正卅幾度高溫，令三人齊齊曬燶變燒豬，嘉莉表示：「真係好曬，個個第一日都變晒燒豬，第二日化妝師就發現粉底唔啱色，要再買過。」

陳嘉桓亦相當喜歡今次拍攝的照片，大讚師傅擔任攝影師令她們受寵若驚，談到理想中的婚禮，她謂：「我鍾意陽光與海灘，想喺外國搞婚禮，同啲親戚朋友一齊玩！依家公司起咗一個咁靚嘅影視城，都可以考慮喺影城搞，因為入面有好多好靚嘅歐陸、古裝、民初場景，仲有一個非常好嘅婚禮場地！」

文：影視組