洪永城黐實過馬路唐詩詠怕醜唔畀拖
圈中甜蜜情侶洪永城與唐詩詠昨日拍拖出巡銅鑼灣，被大批記者撞個正着，洪永城數度想在記者面前大方拖女友，可惜唐詩詠怕怕醜醜，一味甜笑唔肯伸手配合，結果兩人黐到實過馬路，但仍然未上演甜蜜一拖！
唐詩詠與洪永城這一對向來甜甜蜜蜜，昨日傍晚5時多，戴眼鏡束上馬尾的唐詩詠相約男友在銅鑼灣拍拖，兩人並肩而行，邊行邊傾，怎知撞正大批記者，一對戀人即時一臉尷尬，怕怕醜醜的唐詩詠立即不多說話，期間洪永城多次大方想出手拖實女友，點知唐詩詠淨係甜笑，一直唔肯伸手出嚟配合，及至過馬路時，洪永城又再想出手，但唐詩詠依然冇乜反應，兩人於是肩貼肩過馬路，會合一名女友人往咖啡店。
關菊英拍拖行街
入到咖啡店洪永城和唐詩詠並排而坐，期間又有大批記者於咖啡店外拍攝，只見洪永城逗留約15分鐘便走人，讓女友和友人慢慢傾心事。一臉笑容步出的洪永城被問及是否傾婚事？他說：「唔係！唔係！」再問到早前和女友結伴睇樓，他繼續笑笑口未有作答，是否先買樓再結婚？他仍不肯開口，及至問到結婚會否請馬國明？他才說：「無可奉告！」隨即急急腳走人。
另外，關菊英和同性密友周偉利亦到銅鑼灣行名店，遇上記者時，關菊英笑着打招呼，兩人逗留一陣便離開，手上並沒戰利品。
文、攝：追蹤組