黃宗澤撩張繼聰露股玩HeHe

黃宗澤（Bosco）、蕭正楠（Edwin）、張繼聰及龔嘉欣等，前晚到西貢出席無綫劇集《幕後玩家》煞科宴，3位男主角均以全黑打扮亮相，襯到絕！Bosco笑言有興趣拍續集，更不介意演同性戀題材，齊齊做「串燒三兄弟」：「正呀！問吓監製先！（拍到《春光乍洩》咁？）好呀，創新嘛！要挑戰吓！（露埋股？）叫阿聰啦！佢身材咁好！（你都唔差啦？）咁咪鬥露囉！」Edwin則笑言要先問准女友黃翠如才可答應。至於提到監製劉家豪及梅小青有意炮製劇集《溏心風暴》第三輯，曾參演第一、二輯的Bosco表示仍未收到消息，但有意再參演。