何傲兒染怪病冇晒味覺
藝人何傲兒日前到台灣旅行，雖然美食當前，但她非常節制，笑言：「依家每次去完旅行，都會瘦咗返嚟！話說有一次我去日本拍旅遊特輯，返港時媽咪接我機，佢當時見到個女仔背影好似我，但見到個女仔屁股咁大，又覺得冇理由係我，因為自己以前去日本真係冇節制，乜都食，雪糕一杯又一杯，經過嗰次之後，我同自己講，去親旅行都要自我警惕，因為返嚟香港減肥仲辛苦。」又說現時去旅行，都會一味死忍！
一病瘦幾磅
傲兒又坦言以前自己「有肉」，更一度被封為「豪華臀」，令她十分介意，現時「瘦身」成功兼去年行泳衣騷搣甩這個「臀」後，自信心都返晒嚟。
不過今次台灣之旅，傲兒於尾段身體不適，返港後更病足兩星期，更一度患了「怪病」：「本來只係喉嚨痛同失聲，但之後就冇晒味覺，食豉油都冇味，足足維持咗個多星期，睇咗醫生都冇用，初時都好驚，唔知乜嘢事，不過近日開始有番味覺，之前嗰段時間，我真係明白食龍肉都冇味嘅滋味，結果足足瘦咗四、五磅。」
文：影視組