許家傑忍口操肌撐到60歲
香港先生冠軍許家傑參加比賽後迷上健身，最近更戒盡油鹽糖，減去十五磅，練成一身鋼條身形，胸肌及六舊腹肌爆現。許家傑認為練得一身爆肌最痛苦是要戒吃最愛的芝士餅：「真係比死更難受。」他更希望保持弗爆身形到六十歲。
2009年香港先生冠軍許家傑向來喜歡運動，參加比賽後更加迷上了健身，最近他刻意減了十五磅，身形更弗，六舊腹肌與胸肌爆現，他說：「參加香港先生開始對健身有興趣，識咗一班志同道合好朋友好似翟威廉、溫家偉，大家都鍾意健身做運動，不時約埋一齊操。」
戒掉壞習慣
許家傑的健美身形可謂得來不易，除了一星期最少操三日，最痛苦是戒吃甜品，尤其最愛的芝士餅，他說：「最近減咗十五磅，戒咗好多壞習慣，夜瞓、戒油鹽糖，食得好健康，最痛苦係見到人哋食芝士餅自己冇得食，真係比死更難受。不過，戒油鹽糖後反而可以食到食物本身嘅鮮味，烚雞其實好有雞味，依家食乾炒牛河都有啲病態，先要用水洗一洗先食。」
許家傑認為操得一身爆肌最難是持之以恒，希望能保持弗爆身形到六十歲，他說：「同張繼聰傾偈，佢每日都會堅持跑半個鐘，就算凌晨四點收工，一早要開工都堅持。」許家傑的終極目標是練得擁有彭于晏又瘦又大隻的身形。
崇拜黃光亮
在劇集《火線下的江湖大佬》中，許家傑飾演十分崇拜黃光亮的蠱惑仔，角色戇直，與黃光亮鬧出不少笑話，事實許家傑的確十分尊敬黃光亮：「開工時候有黃光亮帶領下，大家好有團隊精神。第一次見佢覺得佢好惡、好兇狠，有次佢有場戲做得好好，於是硬住頭皮去請教佢，估唔到佢會傾囊相授，將佢嘅心得話晒畀我聽，之後我哋成為朋友，好感激呢位前輩。」
文：影視組
攝：劉智源
場地：Spark Fight & Fitness