Cheronna玩SheShe想做TB

組合Super Girls將於下月三日，聯同譚詠麟、孫耀威及草蜢等舉行《Yes!25週年演唱會》，有幸跟前輩同台表演，五女大感榮幸和開心，希望屆時可以唱對方金曲！Yanny想唱《愛情陷阱》，Jessica稱想與孫耀威合唱《愛的故事上集》。問到跟他們同場合作可感壓力？她們坦言有：「佢哋點都有少少機會喺後台聽到我哋唱，所以都希望嗰日表演會做到最好。」講到演唱會以校園為主題，問到時可會穿校服上台？她們稱未知，反而呼籲入場觀眾穿校服：「好似上堂咁仲得意，帶佢哋返去校園回憶。」

Aka男女通殺

講到讀書時期，身為靚女的她們一定很多人追，對此她們大方分享以前情竇初開的故事，其中Yanny坦言細個喜歡男仔會扮作很憎對方，因為很怕對方知道自己喜歡他。相反另外四人則會大膽求愛，其中Heidi表示小學時不怕醜，會主動問男仔喜不喜歡自己，中學時到了情人節會整曲奇餅送給心儀的師兄。Jessica亦稱小時候愛玩電話三人會議，跟朋友一起打給喜歡的男孩試探對方是否喜歡自己：「會叫朋友幫我問，但自己就唔出聲喺度聽。」

Cheronna曾向女同學表白，可惜食檸檬！

Aka自爆曾偷偷用電腦合成與師姐的合照。

中學讀女校的Aka自爆試過仰慕蓄短髮、打籃球的師姐，曾偷偷用電腦合成兩人合照，她亦講到曾喜歡鄰校男生，並做了件白癡事：「其實我唔識佢，所以我Set咗10條問題諗住問佢，例如姓名、電話等，但我每次見到佢都好驚，唔敢攞出嚟，結果都冇畀佢填。」

唔想為結婚而結婚

至於同樣讀女校的Cheronna坦言曾喜歡坐其旁邊的女同學，更主動向對方表白：「佢好靚女、好斯文，我畀佢吸引係因為佢啲英文好叻，我有好想保護佢嘅感覺，甚至有段時間覺得自己真係鍾意佢，想剪短頭髮做TB，之後我真係有同佢表白，點知佢話原來已經同另一個同學一齊。」她解釋自己並非喜歡女仔，只是細個不懂分喜歡和愛：「可能我係鍾意一個朋友，鍾意到好想擁有呢個朋友，或者某程度上可能係我想變到佢咁。」講回現時愛情生活，單身的她們不約而同表示未恨嫁，Yanny和Jessica不想為結婚而結婚，Aka謂已看化結婚這回事：「社會有好多枷鎖，話某個年齡就一定要結婚生仔，但其實每人條路都唔同，連我媽咪都話『我唔急你唔好急呀』，所以奉勸大家一句，寧缺勿濫，唔好令自己傷心，對愛情順其自然。」

文：音樂組

攝：吳文聰

場地：杏花邨美國冒險樂園

髮型：Calvin Tsoi & Yan Kwok @ HAiR

服裝：iBLUES（Heidi,Yanny & Aka）、MAX & Co.（Cheronna & Jessica）