李蘊奶不夠 任BB捱餓

現年24歲的歌手李蘊（Renee）於本月16日誕下女兒，休養三天後，昨午她在母親及經理人陪同下出院，見她面容和身形依然腫脹。問到內地金融才俊老公羅章冠和囡囡為何沒有出現？她表示：「老公比較低調，所以就帶走咗囡囡先，同埋又怕BB啱啱出世會畀閃光燈閃親。」她又踢爆老公陪產時極之落力：「因為我要用晒啲力喺下面，所以醫生唔畀我嗌，結果我老公就喺隔籬叫得勁過我，係咁喺到『推啊、頂啊』，佢見到阿女出世仲喊晒，一見到就錫落BB個頭到，但我聞咗笑氣呆呆地，所以就抱住佢聞吓啲血味。」

狠心唔補奶粉

Renee透露現時未上到真正母乳，但仍會繼續堅持：「呢幾日都有試，姑娘話BB有進步，雖然依家係初乳，但照畀BB食住先。雖然見佢唔飽喊得好慘，但都希望可以狠心唔補奶粉。（咁狠心？）醫院姑娘話要狠心啲，要餵全人奶嘅話，依家初乳就算食唔飽都唔可以補奶粉，咁先可以成功。但我作為新手媽媽，見到佢喊得咁慘，所以都要問吓餵母乳嘅親戚朋友嘅意見先。」她強調會堅持餵半年母乳。

李蘊高炒自拍，即時瘦晒，證明角度的重要性。	李蘊囝囝昨日正式返屋企。	李蘊爆老公陪產時勁激動。

未幫囝囝改名

問Renee之後可有打算追多個仔湊「好」字？她即耍手擰頭，笑言因不是無痛分娩，想起生仔的痛楚都怕怕。她說：「我生完第二日就有人問我呢個問題，但我話唔好喇，太痛喇，湊好個女先。我生完第一晚一合埋眼就諗起生緊嗰個場面，醫生喺下面整整整嗰啲場面，我第一晚都因為咁瞓唔到。」並稱仍未為BB改名。另外，她出院後分別上載單人相及BB相到社交平台，還留言：「返到屋企幾開心。」

文：音樂組