周潤發61歲都係青年人！

早前聯合國世界衞生組織對年齡劃分標準作出新規定，以往六十幾七十歲被叫「老人家」，現在這個「習慣」終被改寫，世衞將人的一生分為五個階段，當中18至65歲是青年人。

中醫都唔使睇

神級影帝周潤發當然是「青年人」的表表者，近年愛上行山的他不時被登山客「野生捕獲」，並放上社交網站，足以證明他的確經常出沒各大行山熱點，絕非得個講字！前日61歲生日的他，不忘照舊行山，更被大批行山的市民捉實影合照，適逢生日心情當然靚爆，加上一向親民的他繼續有求必應，負責揸機玩自拍。

記者問周潤發為何生日都去行山？他表示近年多做運動及行山，並每日運動3小時，發現身心都健康不少，精神變好，更直言整個人生也不同，他說：「自從開始做運動同行山之後，身體係好咗，自己五臟六腑都好咗，小病痛都冇埋，連中醫都唔使睇，過去好易會攰，但依家每日感覺都係好精神，我成個人生都唔同晒，所以就算生日我都堅持去行山！」周潤發以健康行先，即使踏入61歲精神也愈來愈好，絕對符合世衞將18至65歲劃分為青年人的新標準，貫徹他的生日願望「身體健康」。

「自拍神」周潤發親自操刀，與發嫂玩自拍。

平日食得清淡的周潤發，在生日飯局中破戒食油膩食物，一日咁多啦！

破戒食乳豬

去年60大壽，周潤發相約好友到元朗食盆菜，今年他除了行山，更與太太及好友吃中菜慶祝，發哥平日以清淡食物為主，但在前晚生日飯局中就破戒吃乳豬與清湯腩等油膩食物，當然少不了他至愛的魚湯。周潤發與發嫂陳薈蓮結婚多年，一直恩愛，二人互相扶持，為賀老公61歲生日的大日子，發嫂除準備了一個立體蛋糕外，更送上一大籠壽包賀老公生日，中式西式都有齊，十分細心！心情大靚的周潤發亦不忘跟發嫂頭貼頭自拍，恩愛得羨煞旁人！

文：影視組