周星馳筷子打Beat薛家燕跳足20分鐘
薛家燕昨日以20年前於電影《食神》中的「味公主」造型示人，更大跳Agogo。她「怨」爆指當年拍此片時，周星馳要她於零伴奏下跳足廿分鐘Agogo，對方更用筷子敲杯打Beat！問她是否恨做星爺電影《美人魚》角色時，她笑言：「都有魚咁大個肚腩！」
藝人薛家燕昨日以1996年拍攝的經典電影《食神》造型，與安德尊到北角拍攝「富臨月餅」廣告，獲總經理吳剛到場打氣，她更即場大跳招牌Agogo舞，場面有趣。薛家燕自爆當年於《食神》中跳Agogo的始末，大吐「怨氣」地說：「其實真係要多謝我！當時星爺問有咩可以代表到我，又問我鍾意咩，我就答佢跳Agogo。之後佢叫我跳睇吓，我話『你唔係講笑嘛』，佢話『我唔係同你講笑』。」她憶述當時星爺在零伴奏下用筷子敲杯打Beat：「跳廿分鐘後我問佢得未，佢就話夠喇。」其實除了家燕姐外，之前梁思浩都曾怨爆指1994年與星爺拍《國產凌凌漆》時，有場戲拍了17個take，但只有1個take roll機，更揚言就算乞食都不會再拍對方的戲。
做凸腩美人魚
雖然怨聲四起，但薛家燕亦大讚星爺拍子打得準：「係冇嗌到Cut，好彩我底子好。佢都算係咁，佢最近戲（票房）幾十億。」問她是否想做星爺鏡頭下的「美人魚」？她自嘲上半身可以，但下半身不合格：「我諗佢都有諗過搵我！都有魚咁大個肚腩！」她又稱今次廣告代言由囡囡石祐珊安排、囝囝石耀庭負責製作，問幾乎全家出動可會提高酬勞？她笑謂：「都係過節開心吓咁。」
文：影視組