歌手關心妍（Jade）結婚七年一直恨生小朋友，今年二月宣布如願造人成功。現時懷孕約七個月的她，一直關心自己的身體狀況，昨日在社交網指之前一直過重，還預告會在Facebook直播分享懷孕情況：「經過一個多月努力戒糖分遠離所有引誘之後，體重終於達標冇過肥了！妊娠糖尿報告出咗，你睇我個表情估吓我合唔合格？今晚7點Facebook live開估！」
在直播片段中，她透露這近月的減磅情況：「之前重多咗七磅，今個月減番少少，要食好清淡嘅嘢，唔可以食甜嘢，又要戒油，好辛苦情況下，要做番少少運動。我見番醫生，我係冇重過，仲輕咗一磅，但係BB就3.1磅，冇輕到，仲重咗，即係我食嘅嘢係啱！」後來還激動表示終於在「妊娠糖尿報告」中合格：「我Pass咗喇！我解封喇！我可以食甜嘢喇！」