葉瀚華酒尋‧餐廳夢
前經濟發展及勞工局局長葉澍堃細仔葉瀚華，為實現兒時夢想不惜放下大律師身份，毅然創業開餐廳酒吧。他透露除了因為鍾意飲飲食食，更重要是想與人分享喜悅，打官司有贏有輸，但與人分享美食則Win Win雙贏冇得輸！
葉瀚華（Ian）父親葉澍堃出名識飲識食，從小受父親薰陶的他，認為食物帶來無窮樂趣。Ian讀經濟出身，曾任職投資銀行，後來再讀法律：「做咗五年律師，之後想趁仲後生睇多啲其他嘢，又因家人成日出去食嘢，自己又鍾意飲食，咁不如做間餐廳酒吧，當朋友聚腳地，我細個時夢想就係開間麥當勞或茶餐廳！」為了美食，Ian旅行時除了觀光，還會參加當地的烹飪班：「去旅行鍾意食地道嘢，亦會報煮食課程，去泰國、意大利等都有學過，喺香港都有去餐廳學煮意粉、乳豬同薄餅，又跟一哥（世界御廚楊貫一）學煮幾味傍身。（煮嘢叻？）識少少，唔見得人。」
與客人分享快樂
暫時放下大律師一職搞餐廳，問家人有否反對？Ian說：「屋企畀好大自由度我，律師資格仲喺度，第日想做可以申請番，我比較好彩屋企人唔使等我養，希望圓咗自己嘅夢想先，我依家有時間都會同啲大律師朋友傾吓案件，研究吓。（覺得大律師較悶？）唔悶，每個案件都唔同，可能有啲Case爭家產、離婚，有好多唔開心嘅嘢，打起官司嚟唔係你死就係我亡，有贏有輸，但食物就唔同，大家可以開心分享，係Win Win嘅情況，我個人比較樂觀，想多啲開心嘢同人分享。」
四出旅行搵「遺珠」
除了食，Ian亦鍾意飲酒，他與一班志同道合的好友開設了新派法越酒吧la bo la，他承認愛飲酒煮食無疑受到爹哋影響：「爹哋見嘅人好多，同佢去食嘢見到好多前輩，學到好多嘢，做人處世嘅態度。好鍾意爹哋話肝嘅Quota有限，要飲點解唔飲啲好嘅酒，唔好咁濫，貴精不貴多，唔係講價錢貴唔貴，係講啲酒靚唔靚、好唔好飲，我介紹過一支70蚊嘅酒，覺得好好。」Ian曾走訪不少著名酒莊，尤其愛發掘冷門酒：「有啲好飲嘅酒，出產地大家少接觸，比較特別。（點搵出嚟？）去旅行時鍾意周圍搵，好似去斯洛文尼亞發現啲白酒幾好飲，不過冇得出口，而身邊有好多朋友都好識飲酒，一齊出去搵酒返嚟係好開心。」
文：名人組