蕭定一3招翻身點石成金
黃翠如爸爸早前公司上市的勵志故事令人振奮，娛圈其實都有一個「喺左近」，說的正是中國3D數碼主席蕭定一！他於短短十多年間經歷人生起跌，由家族持有三間上市公司、十億現金，到最後一鋪清袋，成家戶口得番廿萬！從零開始打拚的他，憑自創的「成功三招」，終成為市值25億的上市公司主席，旗下藝人張智霖、胡杏兒等個個都是會生金蛋的精英猛將！
蕭定一任主席的中國3D數碼近期搞作多多，於去年中開始，分別收購了周秀娜經理人公司「GME」、周柏豪及連詩雅所屬的「种星堂」及以4億元收購大型音樂連鎖店HMV，在不足一年時間，連環作出多項大型合併計劃，火速成為娛樂圈的新焦點！
蕭定一當年由富二代一下子跌至谷底，一個人租住幾千蚊細屋仔，憑着個人努力打拚到現在坐擁一萬六千呎的辦公室，內設小酒吧、運動休息室，貴氣十足。問到其成功之道？蕭定一大方分享「成功三招」：「建立強大團隊，不怕蝕底、朋友信任，找一份熱愛的工作！」
培育精英 信任團隊
「建立強大的團隊」是蕭定一最感自豪的事，由當初凡事親力親為，到現在公司業務上了軌道發展良好之餘，他更能擁有私人時間，他謂：「初初我乜嘢都會落手落腳做，但近年我已經建立咗一個好強大嘅團隊，無論係宣傳、藝人管理、傾生意、影片買賣等，個個同事都係精英！近期我已經可以朝早七點半起身打乒乓球，之後返工，七點收工後唔再傾工作電話，星期六、日family day，但公司依然運作得好好，全因我花咗好多心機去發掘呢個團隊。」
不怕蝕底 學識睇人
蕭定一近年連環出擊，收購多間具實力的公司，並與內地愛奇藝有合作計劃，全賴他有「不怕蝕底、朋友信任」的做人宗旨：「GME、HMV嘅掌舵人都係我嘅好朋友，佢哋都好信任我，人際網絡係我成功嘅重要一環！至於點樣建立，我諗應該係我不怕蝕底嘅性格，令我可以睇到好多人，分得出邊個會感恩，邊個會攞完着數就走咗去，同時亦令我搵到好多真正嘅朋友，大家互信互助，一齊去建立一啲好嘅嘢。」
寧做橋王 唔做大亨
不斷擴展事業版圖，令人難免認為蕭定一充滿野心，但他自言無意做娛圈大亨或賺大錢。佔公司股份不多的他，一心只為「股民」服務及滿足自己對娛圈工作的熱誠。他自言最愛做公司「大腦」出橋：「我依家做緊嘅嘢，差唔多係日日去面對困難、解決難題，好似之前我要打通內地市場，真係用咗泰山托鼎之力，所以喜歡自己嘅工作係好重要，咁樣你先會有動力行落去。」
如此熱愛工作，對於公司應有一定的抱負或目標，蕭定一笑言現時的目標是發展「HMV online」OTT（互聯網視頻）服務：「OTT係大勢所趨，好有發展潛力！而HMV亦係香港人好熟悉、好出色嘅影音公司，佢哋呢個組合係非常之好，所以我哋未來會花一至兩億元發展「HMV online」OTT（互聯網視頻）服務，望觀眾有更多更好嘅選擇。」文：影視組
後記：親民作風收服人心
蕭定一待人有禮，處事圓滑，就算當了上市公司主席都冇改變，這種親切、和藹的態度，令他贏了不少友誼。而他公司旗下的一班藝人更將公司當成大家庭，無分彼此，只要為公司好都會盡力幫手。」能做到公司上下一心，確實值得驕傲。