趙哲妤「4失」賣袋紓困
前中國小姐趙哲妤（Uny）日前被本報拍得現身尖沙咀變賣名牌手袋，疑陷入財困！事後她受訪時大爆與有線完約後陷入「失業、失財、失戀、失學」的四失狀態。據悉Uny被前男友騙去六位數積蓄，加上她每月要應付近六位數的家庭開支，令她痛定思痛，決心重新出發。
前中國小姐季軍趙哲妤（Uny）於半年前與有線完成主播合約後，工作量大減，曾自嘲星途浮沉的她日前被本報獨家拍得於尖沙咀變賣名牌手袋，估計財政狀況欠佳，疑陷入財困！只見她賣完手袋後到酒吧密密傾電話，似為自己傾job搵銀。
生活迫人 開支龐大
事後Uny受訪時直認有經濟壓力，更大爆早前被圈外男友騙財，無奈陷入「失財、失戀、失業、失學」的四失狀態！提到慘被騙財一事，Uny不願透露被騙金額，只說：「分手後冇咩聯絡了，但銘記於心。」據知Uny被騙去六位數字積蓄，令她財政拮据。被騙的她又透露每月要應付近六位數的固定家庭開支，可謂「雪上加霜」！
Uny直認賣去前男友所送的手袋紓困，更寄望藉此放低舊事，立心重新出發：「呢半年過得好苦，要把值錢卻有紀念價值嘅嘢拎去換錢，就梗係唔想，但生活迫人都要咁做。自己畀開每月五位數家用，仲有物業供款、保險、基金供款同養車錢。（考慮賣車？）諗過，不過先賣咗前男友送嘅袋，想努力重回軌道。」
靠自己 大小job通殺
問到前男友是否富二代？Uny說：「係家境唔錯嘅，佢咁有錢，連女人錢都……不過我都仲信愛情，等我工作一切重上軌道，先會考慮再拍拖。」今次因財困Uny要暫停就讀唱歌及跳舞等演藝課程，目前冇經理人照顧的她惟有靠自己密密傾job，邊搵錢邊增值自己：「不論活動大小，只要正面，都會做。我仲希望接返啲登台，好在有電影公司初步同我傾合作，希望事成後能拍戲。」
文：影視組