吳業坤宅得有深度

歌手吳業坤去年在無綫《勁歌金曲頒獎禮》一夜「霧」起，哭至眼鏡霧化一幕，深深刻在不少香港人心中，亦見證了坤坤這5年在娛樂圈打拚的辛酸。

身為「K歌之王」陳奕迅的粉絲，他把偶像的歌唱得朗朗上口，當中不乏「詞神」黃偉文的作品，想不到如今竟獲對方為新歌《百姓》填詞，他說：「一切係公司安排，我諗應該係機緣巧合下搵到黃偉文先生，我都唔敢問太多，因為唔重要，反正對我嚟講已經係一份好好嘅禮物，從來冇諗過咁快，我正式做歌手嚟計，依家只係第二年。」

突破框框爭氣

由平凡的「公屋仔」到台慶上的「棋子」，再進一步蛻變成橫掃樂壇新人獎的明日之星，全因坤坤懂得在這狹隘的社會中掙扎。他認為《百姓》不但是自己的寫照，亦是香港人的故事：「依家好多人拚搏緊，力爭緊佢哋想做嘅事，呢首歌叫大家爭氣！社會風氣係大家只做分內事，會諗『算啦，唔好搞咁多嘢』。」問到他自己又怎樣「爭氣」？他說：「如果淨係做分內事嘅話，我就淨係做主持同拍劇，點會搵機會唱歌啫！唔需要打低任何人先叫爭氣，只係做啲環境規限以外嘅事，已經算爭氣。」

坤坤第二年做歌手已獲黃偉文寫歌，令他非常感恩。	吳業坤	咬吓平民麵包，有個肚腩仔，是否就是坤坤口中的尋常「百姓」？

獨遊唔覺寂寞

坤坤自認是「偽宅男」，問到怎樣做到「偽宅」？他笑言首先本身要夠「宅」！其實宅男一個最開心，早前他獨自去浙江省江山市旅行，足足去了6天：「冇Plan，周圍行吓，好自由。其實一早需要Relax，之前拍《愛．回家》唔得閒，啱啱拍完先有得放吓假。」他強調不覺得孤獨：「寂寞同孤獨係冇得選擇下先會有，如果自己選擇嘅話，就唔係寂寞同孤獨，而係自由。」

看坤坤就知宅男不一定冇內涵，他說：「點解我講嘢好似好有深度咁？我覺得係因為呢幾年我見過好多人，同埋……睇好多漫畫書，我講真o架！《One Piece》（海賊王）囉！夠你睇一年！唔好以為漫畫純粹娛樂，入面好多道理都畫咗出嚟，用吸引你嘅方法講道理。」

文：張敏妍　

攝：張福宏