陳秀雯張德蘭撐沾Sir Jam歌敍舊
「詞壇聖手」盧國沾昨日率領好友陳秀雯、張德蘭及區瑞強等齊集錄音室，為7月舉行的紅館作品展灌錄主題曲《前程錦繡》，一眾老友久未聚頭，碰面時都非常雀躍，雞啄唔斷！
盧國沾將於7月22至23日在紅館舉行《歌詞大師盧國沾作品演唱會》，獲多位重量級歌手助陣，昨日他率領張德蘭、陳秀雯、柳影虹、麥潔文、區瑞強、葉振棠、李龍基及薰妮等歌手齊集錄音室，而同為嘉賓的羅嘉良與曾路得則有事未能出席。一班老友甫見面即雞啄唔斷，其後齊齊為重新編曲的大會主題曲《前程錦繡》錄音，在旁監督的沾Sir邊聽邊露出滿意笑容。
無意唱埋一份
事後，沾Sir與新娛國際綜藝製作公司負責人丘亞葵（Vigo）一同受訪，談及跟一班老友碰頭，沾Sir坦言很開心，對於曾因經理人合約而對簿公堂的羅嘉良將擔任嘉賓，沾Sir說：「嘉良唔出現，邊個唱《秦始皇》？」他不擔心二人的恩怨會成焦點：「有咩焦點都唔理得咁多，我哋相處愉快。」並表示揀《前程錦繡》作為主題曲是其意思，問到屆時可會開金口唱埋一份？沾Sir笑言自己不識唱，只識欣賞，故只會跟家人在台下欣賞。
神秘特別嘉賓
談及詞壇後輩黃偉文（Wyman）自薦幫忙，沾Sir笑說：「冇咩好幫手，有充足人手。（搵佢寫詞向你致敬？）呢個都可以，大家總算係朋友。」Vigo則表示已找同事跟Wyman聯絡，會邀請他、林夕及潘源良等到場支持。他還透露暫時有10位表演嘉賓，亦會有特別嘉賓，但要賣關子，雖未能邀得關正傑復出做嘉賓，但會找其他歌手唱其金曲。
此外，一眾歌手都表示很開心能參與沾Sir的作品展，其中帶同女兒到場的麥潔文說：「有次食飯問沾Sir究竟《螳螂與我》講乜，但佢解完我都唔明，佢中文水平真係好高同好有詩意！」柳影虹則表示等了此作品展逾30年，自己9成以上歌曲都出自沾Sir手筆。而區瑞強則視沾Sir為半個恩師，因其首張中文碟有一半歌曲都由沾Sir填詞，大讚對方填詞表面簡單，但意境深遠。
文：音樂組
攝：林蔚恩