王浩信堅離地5粒鐘搵命博
王浩信自「渠頭」一角爆出後依然保持人氣，被網民推選為今年視帝之列的他，日前搏晒命為劇集拍攝一場吊威吔戲份，瘦了五磅的他，被吊至五層樓之高，拍攝五小時後，真係索晒氣，有畏高的他更謂：「好似拍緊Super Hero片咁，感覺真係堅離地！」
藝人王浩信現時乃無綫一線小生，劇接劇之餘每部更有不同發揮兼噱頭，憑之前《EU超時任務》的「渠頭」一角，令他成為網民心目中今年視帝之選，現時浩信亦正為拍攝中的劇集《致命復活》搏晒命。日前，他就於大角咀拍攝一場吊高拉Banner的場口，劇情講述曾被綁架禁錮的他患有創傷後遺症，變得非常「玩命」，於宣傳花露水廣告時，想法亦甚為刁鑽。
飛天跳車索晒氣
拍攝當日，浩信被吊至五、六層樓高之餘，最後一個鐘頭更要由貨車跳下來，當日拍足五個多小時，綁了威吔的浩信就吊到索晒氣，現場亦有20、30名臨時演員吶喊助威。
浩信事後接受訪問時，坦言此劇動作場口甚多，拍攝至今自己都瘦了五磅，原來浩信更有畏高：「今次係我吊得最高的一次，就算我係嚴重畏高狀態，都完全冇晒感覺，好似拍緊Super Hero片，隨時真係飛起咁，感覺真係堅離地！」
「渠頭」帶挈搵銀
說到現場不少途人都大叫「渠頭」，浩信坦言：「的確現時啲人叫我『渠頭』多過浩信，不過呢個都係開心嘅，起碼佢哋心入面仲有『渠頭』。（『渠頭』為你帶來不少進帳？）好榮幸地工作都多咗，拍咗保險及牙膏廣告，全部都係開心價。」
浩信拍《致》劇都已四、五個月，拍畢後他就會跟太太陳自瑤及女兒去旅行休息，不過他的檔期亦排得相當密，劇集方面已排到明年年頭，浩信透露六月將要籌備拍攝另一部劇集，會跟唐詩詠有不少對手戲。
文：影視組