黎明坐摩天輪被爆畏高

搭膊頭玩自拍

演唱會於六時「入席」，同時工作人員亦為頭100名歌迷派發抽獎劵，今次的抽獎相當刺激，事關被命運選中的四個幸運兒會親自「揭」曉「獎品」，若果在抽獎劵上印有「恭喜你，你可以乘搭摩天輪」即代表中獎，可與Leon一齊坐摩天輪！有歌迷為贏得與偶像相聚的機會，早於中午一時到場排隊。期間亦下起滂沱大雨，天文台先後發出「雷暴警告」和「黃色暴雨警告」，大會表示整個演唱會早已買保險，可以放心。

摩天輪「啟市」首批幸運兒分別來自香港、上海、佛山和紐約的歌迷，Leon傍晚乘車抵達現場，又再傾盆大雨，他與粉絲合照後齊齊登上摩天輪轉一周，僅僅五分鐘後Leon返回地面，又向大家合十打招呼。到底在摩天輪卡箱的短短五分鐘怎樣過？四位歌迷大爆Leon弱點：「Leon話佢畏高，同埋叫我哋唔好搖。」而Leon更親自與她們搭膊頭撳掣自拍，問到Leon可有即興講金句？四人笑言是秘密，只透露Leon大讚維港好靚。

四位幸運粉絲與黎明齊坐摩天輪五分鐘。	放大圖片	胡楓畀Like：Leon獲契爺胡楓、陳伶俐與老公劉頌銘、黃宇詩、趙學而等撐場，胡楓大讚Leon在面對困境時做得好：「100個Like，喺咁困難時間頂得住，畀我就瞓低咗。」

篷頂人手撥水

8時26分演唱會正式開騷，黎明在台上分享與粉絲在摩天輪上的對話，他被問幾時結婚：「有啲女仔可以組織家庭，有啲女仔就咬晒牙籤好獨行俠咁，遇到結婚就結婚啦，遇唔到就等待結婚啦……呢個社會依家好完善嘅，有老人院，最緊要大家健健康康。」他又爆被北京婆婆催婚：「每次返去都同我講同一番說話，問我幾時結婚生孫，最後我叫婆婆冷靜啲，呢個係我嘅人生，我做嘅嘢係正常事，唔能夠為一個人改變自己，所以你等到梗係等啦！否則我都會陪你傾偈嘅。」昨晚演唱會是多晚以來最早開場，而完場亦是歷來最早，10時13分完結。

大批粉絲冒滂沱大雨排隊。

工作人員則在帳篷頂以人手撥水。

同時，因演唱會時仍下大雨，中午在帳篷頂人手撥水的工作人員未有休息，撥水工作與演唱會同步進行。

雖然天氣不佳，但仍有近百歌迷聚集於「核心外圍」擔遮聽歌，亦有歌迷野餐，其中施先生稱之前已在「核心內圍」睇過騷，意猶未盡再來野餐。

文：音樂組　

攝：司徒國榮、鄭家俊