賴慰玲 陳嘉寶：溝掂陳凱琳 嘉穎最夠薑
陳嘉寶（Anjaylia）與賴慰玲（Winki）在無綫劇集《殭》再次合作，默契更進一步。從夠薑拍《殭》拍到僵，Anjay和Winki講個不停，要論最夠「薑」時，更不約而同高呼「鄭嘉穎」：「搵陳凱琳做女朋友，夠唔夠薑呢？夠薑！」
（A）njaylia：陳嘉寶、（W）inki：賴慰玲
邊個夠我薑！
W：我演藝畢業嗰年借咗一年學費4萬2千蚊同一個女仔去咗42日歐洲，期間試過畀人偷晒啲嘢要報警，爭啲同人打交又要報警，搵唔到路搵咗個黑人帶路行後巷都試過，我覺得呢啲係好夠薑。
A：我係嗰種覺得有道理就會衝過去嗰隻，當年讀大學嗰時，即使啲教授有權扣你分甚至取消資格都好，但我唔理o架，我有立場嘅話就當住咁多人面前同佢拗到面紅耳熱，拗到冇得拗都係覺得佢唔啱，不畏強權。
W：但我覺得你最夠薑係接拍《殭》，因為你係一個好唔郁得嘅人，而你喺入面要打，最後竟然選擇去練劍、練箭、打拳。
A：我個字典係「接咗就得o架喇！」因為船到橋頭自然直！吊威吔？冇問題吖。射箭都OK呀！不過記得有一場戲要我企唐樓頂層最邊位，我話得，冇問題，點知結果去到就震晒囉！
W&A：你話邊個最薑？1、2、3，鄭嘉穎！
W：陸永話佢係一個好有壞人氣質嘅好人，識落先知佢係一個好為人着想嘅人。有時佢拍戲時突然後退少少，你就會驚，令到你好緊張，但其實佢係為你着想會幫你。
A：佢又係一個好保護其他人嘅人，好似我哋呢啲弱勢群組，佢見到我哋有困難或者冒犯咁，佢都第一時間企出嚟，唔止薑呀，型添啦！
W：嗰時喺荷蘭拍嘢，人哋打緊燈嘅時候，佢就喺一條街嘅地下瞓咗喺度，仲瞓着咗。
A：佢作為一個公眾人物係唔會刻意去維持個形象，佢覺得啱、應該做就做，係為咗佢嘅專業，喺街換衫、街邊食飯盒完全冇問題，以一個公眾人物嚟講真係夠薑。
W：咁搵陳凱琳做女朋友夠唔夠薑呢？夠薑！
A：我覺得我哋咁講就真係夠薑喇！但點解佢兩個拍拖係「夠唔夠薑」呢？
W：香港小姐冠軍喎！
A：咁佢都係世紀型男同埋視帝吖！
W：係喎，咁陳凱琳都好夠薑喇！
僵到50個鐘冇瞓，靈魂都出竅！
A：拍《殭》嗰時試過連埋出面工作，四、五十個鐘冇瞓過。
W：我都係連續四、五日冇認真瞓過落張床度，淨係出外景會喺車瞓半個鐘。最多就係返屋企半個鐘沖完涼就走。
A：我係一拍完《殭》就由公司車接我走，做完嘢之後又送番我過嚟拍。我記得係僵到，有時間時只可以諗「半個鐘我到底食飯定係瞓覺？」食飯就頭痛，瞓覺就毀容！
W：我哋兩個，同黃又南、陸永成日都喺埋一齊，記得有一次係我哋四個都有四、五日冇乜瞓過，之後嗰日發生好多事。記得開工嘅時候又南坐咗喺服裝間，我叫佢換衫返屋企沖涼，但佢真係郁唔到，踎咗喺堆衫度話想嘔。嗰時我真係驚佢會死，（望向Anjay）你都有一次無喇喇爆喊！
A：因為覺得好慘，知道自己仲要捱十幾個鐘，但已經係三十幾四十個鐘冇瞓過，我要留力，但又覺得陸永好好笑，我叫自己唔准笑又做唔到，控制唔到自己嘅時候我好嬲，會諗點解我仲要係咁笑浪費能量？
W：我試過「靈魂出竅」！嗰時同又南喺公司收工，然後要即刻出外景，佢就揸車，我叫佢唔好揸，因為太耐冇瞓，之後我坐隔籬就Keep住講嘢令到佢唔好瞓着，點知去到目的地，先發現反而係我瞓着咗，但就仲以為同佢喺度講緊嘢。
最薑一定係生BB！
W：我覺得生BB係好夠薑，我係好想做嘅，但未有呢個咁夠薑嘅衝動。我18歲就想結婚生仔，日日都講，因為我身邊都係差唔多呢啲年紀，個個都結婚生仔，但不斷聽佢哋生仔嘅嘢，我愈聽愈痛，因為真係可以順產出嚟，個過程真係……
A：聽過話係痛到剪下體都唔會有感覺，順產係最夠薑，同埋順產生好多個。
W：我哋阿婆嗰代係生七、八個，全部順產，真係好夠薑。
A：同埋生完出嚟你要應付，要教佢，唔可以畀佢曳同時又唔可以畀太大壓力佢，你創造佢出嚟要對佢嘅生命負責任，我覺得呢件事係好夠薑。因為平時我哋做咩都好，影響到都係自己，就算牽扯到身邊嘅人都係好小事。
後記：女人心事
有說「三個女人一個墟」，但單憑Anjay及Winki二人之力就吵得聲大如墟。默契並非朝夕能成，二人受訪期間絕無冷場，即便其中一方偏離話題，另一個隨即拉回正軌，玩笑適可而止。無論外形、理念以至價值觀，Anjay及Winki都實非同類，但在她們身上確實體現出「和而不同」四個字。
文：影視組
攝：司徒國榮