大坑插旗冰封沖繩滋味火烤高質美食

好姊妹楊秀惠與李思欣最近分別在大坑開食店，楊秀惠搞日式刨冰店賣秘製刨冰，李思欣則開燒烤餐廳，大把明星客，兩人一冰一火，齊齊殺入大坑大展拳腳！

楊秀惠揼百萬冰封沖繩滋味

貪靚愛打扮的楊秀惠兩年前在銅鑼灣開設美容店，專門代理美容產品。愛品嘗美食的她最近再將興趣變成生意，與友人合資近百萬在大坑開設日式刨冰店「越後屋」，上月正式開張，進軍飲食界的她說：「有次去中環試食日式刨冰，覺得呢間店刨冰做得好綿，影相又靚，後生仔一定鍾意！咁啱有朋友識得呢個日本師傅，大家傾吓合作，一拍即合！」

原汁原味日本空運食材

大坑有不少甜品店，楊秀惠透露刨冰店以沖繩味道作招徠：「日本師傅好想推廣沖繩味道，為咗保持呢種味道，師傅堅持所有材料都要喺日本空運過嚟，雖然成本貴，但試完又真係好唔同，啲冰塊同醬料都係師傅秘方。佢每段時期都會諗啲期間限定口味，呢排就推出咗櫻花限定。」

楊秀惠坦言今次與朋友夾份投資，相對獨力經營美容生意輕鬆得多：「喺香港做飲食最難係攞牌照，但我哋嘅拍檔勝在有唔同嘅專業範疇，大家分工清晰。我就最輕鬆，負責做生招牌幫舖頭宣傳，同埋試食畀意見，大家每日都喺WhatsApp Group討論，覺得人多好辦事！」在大坑開店，原來亦要睇天做人，她說：「天氣好會特別多客，落雨就會少人啲，所以人手安排上都好考功夫，訂貨量同時間都要掌握得好準。」提到好姊妹李思欣開設燒烤餐廳，她說：「梗係有試過！我生日都喺嗰度慶祝，間舖環境好好，食物亦夠多元化！」

刨冰店除了賣沖繩刨冰，亦賣香濃咖啡。

刨冰真係大大杯，究竟係一人分量還是三人分量？

放大圖片

北上擴充美容生意

同時間，楊秀惠不斷擴充美容生意，在星馬港都有店舖，更計劃進軍內地市場！回想起當初一手一腳籌備開店，又要拍劇，她試過忙到要在店內過夜，不過為實現個人夢想亦不覺辛苦，滿足感爆燈！吸收兩年經驗後，她認為做生意最重要是有良好溝通：「最難係溝通，我到依家都仲學習緊，有時唔夠瞓都會忟憎，不過會同自己講『做生意最緊要開心』，反而訓練到自己嘅EQ。」

Profile

開業日子：2016年4月

投資金額：近百萬

員工人數：5位

月租：約6萬

李思欣星食堂火烤高質美食

李思欣於2004年入行，加入無綫後參演多部電視劇，包括《四葉草2》、《萬凰之王》及《名媛望族》等，2014年毅然決定以自由身發展。除了接Show登台及拍電影外，她亦受擅長做生意的老公范振鋒影響變身商界女強人，開始經營網上鑽石珠寶買賣及開設食肆，早前更發展水耕菜生意及開保齡球場，百足咁多爪！

要人食過翻尋味
她最近再拓展飲食版圖，與圈中好友麥長青及吳國敬等合資七位數，在大坑開設GROOVY BAR & GRILL燒烤餐廳。思欣事事親力親為，大至裝修，小至店舖招牌的字款都跟到足，至於吳國敬的女友則負責餐具，齊齊分工合作。她坦言最重視食物質素，所以堅持用上大量時間與大廚商討細節，亦不時親自到餐廳試食，務求餐單上每項美食都可以令客人食過翻尋味，她說：「依家食材愈來愈貴，一斤菜都要廿幾蚊，大財團拉勻先有薄利。我認為食物質素好緊要，係好嘢啲客人先會返轉頭！」思欣的餐廳生意不俗，吸引不少圈中好友捧場，如陳豪、陳茵媺、梁漢文、任賢齊及莊思敏等。