謝安琪拍劇生「捱」Encore諗諗
謝安琪去年接拍無綫重頭劇《殭》為入行十年尋找新體驗，第一次拍劇沒有讓她失望，帶來最辛苦的工作挑戰，捱過日夜顛倒的半年，除了意外地擴闊音域，提升唱功，心靈也煉成鬥志，突破心理障礙。不過，講到再拍劇，她笑稱要慎重考慮！
唱歌拍劇日夜顛倒
入行十年的謝安琪為尋求突破，由樂壇跳入公仔箱，首度為無綫拍劇集《殭》，拍攝雖然比預期順利，不過做開歌手的她唔慣開工時間長，加上要日夜顛倒、捱夜捱凍，難怪她坦言是入行十年來捱得最辛苦！
《殭》係自己第一次拍劇，拍之前預咗好艱辛，做足心理準備，拍嗰陣辛苦，但係比預期順利。平時做歌手開工唔會咁長時間，拍劇仲要日夜顛倒，我做殭屍多數夜晚戲，又要捱夜、又凍，拍咗六個月，聽講話呢套劇拍攝超時締造咗歷史，鄭嘉穎都話係佢入行以嚟頭三套最辛苦嘅劇，自己覺得最辛苦係體力付出，要保持狀態半年時刻投入角色。平時瞓好多，都以為會捱唔到眼瞓，但拍戲係群體工作，一開機力量就唔知喺邊度嚟又冇眼瞓，最辛苦係有段時間拍劇仲要去做顧嘉煇演唱會，嗰十二日基本上冇乜點瞓過，每日朝早拍劇收工就去綵排，唱完騷就去拍通宵戲，可以話入行十年以嚟最辛苦，真係可以叫做捱！
唔嗌唔知身體好
拍完之後唔止我驚咗拍劇，我哋成Crew人都驚晒，將來再拍劇真係要慎重考慮。當初係我落呢個拍劇決定，嗰陣係自己入行十周年，想做一啲未做過嘅嘢體驗一下，其實都有少少畀王菀之、阿聰影響，不過冇後悔，今次係好好嘅體驗，因為曾經爆肺，個肺唔係咁好，所以以前做嘢好錫身，冇必要唔會用咁多聲，但係拍戲冇得就，無論幾凍都要着住戲服，又要淋住雨拍，我發覺意志力好緊要，做殭屍要嗌得好犀利，拍完之後發覺自己衝破咗心理障礙，音域闊咗、體力好咗。曾經拍廣告吊威吔吊咗廿幾個鐘，真係嚇親，吊到抑鬱！
今次知有好多打鬥場面本來係有啲驚，但係拍完之後克服吊威吔陰影，仲打得好有型添！自己現實唔打得，所以更加想扮型、扮打得試吓做打女，以前以為做唔到嘅嘢，原來係有能力做到嘅。
高人指點保戲勢
雖然謝安琪拍過戲又演過舞台劇，但今次初嘗拍劇，又是另一番滋味！多得一眾「高人」指點，令她演出有番咁上下！最Sweet當然是老公張繼聰密密探班，又拜託工作人員睇住，想唔感動都難！
以前拍過電影、演過舞台劇，但係電視劇係另一樣嘢，每集一個鐘，好玩嘅地方可以細緻啲，可以畀角色慢慢發展、鋪排。事前都有問老公，自己覺得好有福，未開拍撞到胡定欣、楊怡、萬綺雯、徐子珊，佢哋都畀好多貼士我，好似叫我要保持體力、狀態，要取捨去拍一啲重頭戲，好多謝大家唔吝嗇咁教我。仲要好多謝白只，佢係我好欣賞嘅演員，嗰陣佢咁啱有個半月空檔，佢就做咗我嘅演戲老師、教練，每日嚟我屋企同我備課、分析劇本、逐場戲同我研究點做。去到拍嗰陣直情現場跟住我畀意見，做得好嘅叫我保持住，畀咗好多信心我，對我幫助好大，自己第一次拍劇乜都唔識，又冇學過演戲，有個咁有演戲經驗嘅人喺度差好遠，阿聰見有白只喺度都好放心。
老公背後 打晒招呼
阿聰平時都有搵我幫佢練對白，睇佢點樣決定做一個角色，好似佢做一個歷史人物佢會睇好多書，正傳，自傳、野史，所以都鍾意同佢一齊準備演戲、對戲，好佩服佢，同佢對戲時我做過好多角色，做過王菀之、連男人都做過，哈哈！阿聰嗰時拍緊《收規華》，雖然冇時間同我對劇本，但係佢好關心，成日過嚟探班，睇吓我做成點，又同演員、監製收吓風睇吓我拍成點，又同所有道具、燈光、龍虎武師打晒招呼，話我老婆第一次拍嘢，同我提點吓佢，啲師傅見到我話應承咗聰仔睇住你，好多人同我講睇住我，哈哈！好溫馨！令到我好感動！
其實之前好多機會邀請我同阿聰一齊合作，拍戲、唱歌、演出，但係我哋都推咗，想留番發展空間畀大家，現實生活已經係夫婦，如果再用情侶檔、夫妻檔演出，嗰個發展、創作空間會細咗，暫時唔考慮夫妻檔演出。
天敵變情人埋嚟咀
謝安琪首度與鄭嘉穎合作，已經要演情侶兼拍咀戲，緊張是在所難免，二人事前亦有溝通，拍攝順利，而她拍攝前亦先向老公張繼聰備案。
今次同鄭嘉穎唔止係第一次合作，記者會更加係第一次見面，佢有畀意見我，學到好多嘢，佢知我新人緊張，叫我當玩咁去做。戲裏面講我哋本來係天敵，佢係不死人，我係殭屍，慢慢發生感情，後來成為情侶，戲裏面同鄭嘉穎有咀戲，佢就經驗豐富，我就好緊張，大家事前都有溝通，佢叫我唔使緊張，話呢啲係本能嚟，要錫就自然錫埋嚟，唔使諗咁多，鏡頭會就，咀戲唔算多，都係點到即止。
拍嗰陣都有話畀阿聰聽，佢冇嚟監場，大家唔會限制對方工作，我都唔會話你接咗套戲唔可以有身體接觸，呢個年代正常感情戲都會有呢啲情節。陳凱琳因為阿聰同佢拍《四個女仔三個BAR》而認識，佢份人好開朗，劇裏面做我個妹，本身我冇兄弟姊妹，好恨有細佬妹嘅感覺，所以拍戲好自然流露，拍完之後佢都叫我做家姐。
後記：點可以唔提張繼聰！
謝安琪希望保留創作空間，暫時不考慮與老公張繼聰合體演出，不過，訪問中每次講起阿聰，她都自然流露出甜蜜笑容，甚至乎崇拜的神態；而阿聰在訪問中亦不時提起妻子滴點，夫妻默契在字裏行間流露。