Miki晒百萬行頭喊住入豪門

現年31歲的前女子組合Cookies成員楊愛瑾（Miki），與永安太子爺郭永淳拍拖八年終於修成正果，昨日在港舉行婚禮，在四百名親朋見證下嫁入豪門，晒百萬行頭榮升「郭太」。Miki在姊妹陪同受訪時自爆喊不停，笑言被老公靚仔吸引。

「餅碎」Miki因被傳介入郭永淳（Edwin）與前妻的婚姻，令戀情一直不被睇好，但經重重考驗終於修成正果，昨日在港舉行小型婚禮。婚禮分兩部分進行，但過程謝絕採訪。新郎哥一早到酒店接新娘，Edwin跪地送花給穿上中式裙褂的Miki，誠意十足下抱得美人歸。其後，一對新人抵達深水灣鄉村俱樂部，在牧師見證下以基督教形式進行簽字儀式，出席賓客主要是男方親朋約200人。

宣誓時最為感動

下午時分，兩人在深水灣鄉村俱樂部舉行Cocktail Party，約200名Miki好友到場。Miki穿上白色婚紗現身，透露因老公怕醜，故由好姊妹鄧麗欣（Stephy）與吳雨霏（Kary）陪同見傳媒，另一Cookies姊妹區文詩則因病缺席。Miki透露出嫁心情既開心又感動，問到有否感動到喊？她指婚禮最感動是進場一刻：「我忍住唔喊，因為一揭起頭紗見到喊晒好似好奇怪，但宣誓嗰陣都喊咗。（同老公有咩愛的宣言？）放喺心度。」她又坦言婚後繼續工作：「只係名份唔同咗，但未必係我一個人決定，要同對方商量。（老公點樣打動你？）最主要都係靚仔。（婚後趕造人？）我哋都係順其自然，有就有，冇就遲啲先。」問到與老公排除萬難完婚是否鬆一口氣？她指今次來的人都是真心祝福他們，看到這情景已感開心：「我哋都知道之後會開心嘅。」不過提到下月是否到外地舉行婚禮，她則不願透露詳情：「今日（昨日）搞掂咗先諗其他。」