蔡加讚孖仔覺覺豬 紙板B迎賓
玩具大王蔡志明兒子蔡加讚（Karson）與汪圓圓前晚為孖仔舉行百日宴，現場有孖仔1:1的人形紙板，嘉賓原本爭相抱起孖仔合照，不過當孖仔瞓覺後，家人仍抱起紙板孖B拍照，場面有趣！更搞笑的是加讚至今仍分不出大孖、細孖，要靠太太為他們着不同衫區別。
蔡加讚和汪圓圓前晚在深灣遊艇會為孖仔Christian與Kameron舉行百日宴，以中菜宴客，蔡汪兩家有感孖仔年紀尚小，故只邀請至親好友出席宴會，蔡志明與太太蔡李惠莉、蔡加敏伉儷、蔡加怡、汪圓圓父母以及圓圓家姐汪詩詩等均有出席。
百日宴以挪亞方舟為主題，因該故事的動物都是一對的，取其孖仔也是一對之意。而現場有爆谷、棉花糖、蛋糕等美食，亦放置動物紙板公仔及1:1的孖B紙板公仔，原本嘉賓都爭着抱B合照，不過當孖B睡着後，大家仍不放過機會，抱着孖B紙板影個夠，認真搞笑。
性格各不同
Karson和圓圓結婚兩年多，先後育有大女Celine和孖仔，二人認為兩年抱三是上天的眷顧，加讚坦言：「Christian同Kameron係同卵雙生嘅孖生兄弟，外貌好似，尋晚着上孖仔裝，簡直一模一樣，不過佢哋嘅性格就好唔同，大哥Christian有大哥風範，較有氣勢，細佬Kameron比較隨和，見到人都好鍾意笑。而大女Celine似足媽咪圓圓，孖仔眼、鼻同嘴就似足我。」加讚又透露孖仔的中文名源自大女Celine的中文名「蔡婧妍」，孖仔將「婧」字改「靖」，改名為「靖天」、「靖曦」。
三個好滿足
當晚由圓圓表妹湛琪清擔任司儀，而圓圓亦特別設計了不少關於孖仔的有趣遊戲，令賓客更加認識孖B。問到蔡加讚會否再追第四個B時，他說：「我哋有3名子女，已經好幸福同滿足，暫不考慮再添B，雖然撫養3個子女唔容易，但見孩子們一日一日長大， 實在係一件好開心嘅事。」他說孖仔人緣甚佳，大女很疼錫兩個細佬，孖仔又得爺爺嫲嫲歡心，不過至今Karson仍然分不出孖仔，要靠圓圓幫他們着不同色的衣服以作辨別。
文：名人組