林峯離地犯險飛越山頂

林峯第五度在紅館開騷，今次要以最近距離與山頂位觀眾接觸：「我依家企嘅係山腰位，到時成個場館會圍咗一條軌道，用嚟做啲乜？留番少少想像空間畀大家。（吊上半空？）唔知(0架)，畀啲Surprise好啲！總之大家守秩序，我就會喺安全下做多啲突破。」

怕歌迷拉腳

原來林峯準備吊上高達30呎鐵架排練，問到正式演出會否更高？他謂：「冇畀限制佢哋，總之我冇嗌停就任佢吊高，雖然我有嚴重畏高，但on show唔理得咁多，拍戲都係頂硬上，吊高過樹頂成百呎飛嚟飛去都有。」但林峯強調非為挑戰高度，而是挑戰同山頂觀眾距離：「對我嚟講係突破。（事先要向紅館申請？）當然要啦！都期待on show會點！（怕唔怕到時歌迷興奮跳起拉腳？）都驚o架，之前演唱會雙手都有晒歌迷抓痕。」講到英皇可有為他買重保險？他笑言：「呢樣我唔知，應該有嘅。」

林峯扣上威吔玩倒吊，旁觀者看得驚心動魄。

林峯希望與山頂的觀眾拉近距離，決心克服畏高挑戰難度。

之後林峯即場扣上威吔「試飛」，升到離地廿多呎時，他更一顯身手來個「翻身倒掛」。畏高的林峯即摸摸胸口說：「心跳加速緊呀！」但他仍面不改容再試吊幾次，又笑謂：「唔知倒吊唱唔唱歌呢？」林峯玩完離地，再與十多舞蹈員進行地獄式排舞，一口氣跳足十幾分鐘勁舞，他謂：「今次演唱會由頭跳到尾，仲有個高速旋轉變形舞台，呢個反而最危險，但仲未搭起，要爭取開騷前兩日時間去排。」

拒千語探班

是否禁止女友吳千語BB探班以免分心？林峯笑謂：「唔關事，不嬲工作還工作，我哋工作分得好開。（保留神秘感畀BB？）我係保留神秘感畀全世界。」

文：音樂組　

攝：唐豁莊