陸詩韻擲百萬 34D網上賣Bra
現時香港經濟市道令人擔憂，多個行業都裁員甚至結業，零售業及飲食業情況更每況愈下，但不少藝人都於此時加入「老闆」之列，前港姐陸詩韻最近就為其網上生意全面出擊，大騷S形美好身段谷胸上陣拍廣告照，親自做「生招牌」。
前港姐陸詩韻曾做空姐四年，2005年當選香港小姐亞軍後加入娛圈，拍過多部劇集及電影，亦曾任司儀。不過詩韻之後有感事業發展不大，故突然半退娛圈從商，起初幫其從事製衣貿易生意的父親打理業務，但性格獨立的她始終有野心，故四年前自己搞物流貿易公司，負責做中間人聯絡廠商及外國買家，事事親力親為。現時，她除了與友人合資開餐廳，更發展網上生意，且愈搞愈大，更親身性感出擊，為自家設計的內衣品牌任「代言人」。
詩韻受訪時透露網上生意去年七月開始，並以其英文名命名為Sharon's Workshop，詩韻表示投資了約百萬：「做咗嘢咁多年，一路都有儲錢，咁大個女都會有啲投資，所以今次唔算用晒畢生積蓄。」詩韻於網上除了有做日本或其他地方的美容護膚品生意，早前更搞埋網上內衣、睡衣生意。
意念嚇窒設計師
Sharon's Temptation，之前她找來外籍模特兒為自己設計的產品拍廣告照，今次她就親自上陣做「代言人」，谷盡34D上圍晒三吋事業線及長腿拍硬照作「生招牌」。詩韻謂：「美容用品嗰邊反應相當唔錯，但創立內衣品牌係我由細到大嘅夢想，所以一齊做。今次同法國品牌廠商合作，佢哋畀機會我自己嘗試設計，依家喺我自家網店、香港、澳門一啲百貨公司都有得賣。」詩韻從沒學過設計，故今次有找專業設計師給意見，而她的想法相當前衞，更嚇窒設計師，她笑言：「我嘅諗法好天馬行空，我設計嘅喱士睡衣開衩開到去肚臍，佢話唔得，咁會無力承受到，條褲會甩，咁惟有諗過第二個款，幾好笑。」
問詩韻為何首次找來模特兒而自己不上陣做生招牌？她謂：「嗰陣好猶豫，覺得朋友設計得咁靚，點解唔自己示範？冇諗過自己要做呢樣嘢宣傳，不過之前啲朋友有畀意見，覺得自己着番會更加知道邊部分要凸顯設計、身體各部分嘅呈現，所以今次就自己上陣。」
日前詩韻穿性感透視睡衣拍攝，低胸之餘更晒香肩，另外有西裝、Bra Top高衩裙及恤衫晒Bra造型。詩韻非常落力，跳埋彈床以求最佳效果，她說：「靚就得嘞！對我嚟講，冇辛苦兩個字，最緊要出嚟效果靚，大家滿意就得。（底線？）我要有質素，呢個一定要，唔係話露多少少同露少啲嘅問題。」
追數追到發忟憎
提到之前做生意經驗，詩韻坦言碰過不少釘，所以學曉很多：「做老闆唔簡單，要照顧十幾個員工，好大壓力，日日要諗追單追數，嗰陣成日都做到好忟。做貿易吃力不討好，試過自掏荷包20萬擺平客戶間嘅糾紛。因為當時內地廠方遲咗出貨，用船運貨太慢，令外國買家收唔到，自己惟有『硬食』攞20萬飛機運費，確保對方收到貨，做中間人就係咁，經常有機會賠錢，明明蝕錢都要保住公司信譽。」
網上生意衝出香港!
Sharon's Workshop Online store
Boss：陸詩韻（Sharon）
開業日期：2015年7月
產品範圍：護膚品代理及批發，自家護膚品牌及自家設計睡衣
內衣系列Sharon's Temptation (香港、 內地、澳門）
投資金額：100萬（主要用於網站製作、Logo及硬件設計，還有包裝、傳單、文字編寫、不同品牌代理費用、入貨、宣傳活動、贊助等）
網頁瀏覽人數：約130,000人
最新發展：開始進入跨境電商網絡、批發與零售同步進行，不同店舖有售代理及自家品牌產品
文：影視組