關淑怡「告別唱」 趴街.挽鞋.搵老竇

關淑怡前晚在紅館舉行紀念入行25周年演唱會,跟觀眾握手時不慎跣低撻生魚,經驗豐富的她即執生豪氣地赤腳繼續表演!之後嘉賓校長譚詠麟手持一雙波鞋上台,實行為她獻聲兼挽鞋!

歌手關淑怡(Shirley)前晚在紅館舉行《The Best of Shirley Kwan 25 Live關淑怡演唱會》,全晚換了八套歌衫,有騷腿亦有大露背裝。她獻唱多首金曲,當穿上五吋高跟鞋行到台邊跟觀眾握手時,她突然跌在台上並尖叫「呀」一聲,高跟鞋亦跌甩,她在保安攙扶下企起身,豪氣地說:「I don't need shoes.」之後赤腳唱出幾首快歌,一度high到跪地。

籲搵過個:唔一定踩住波車

唱《夢伴》時,嘉賓譚詠麟(校長)手持一雙波鞋出場給她穿,又大放笑彈:「娛樂版頭條會係譚詠麟幫你挽鞋,見到你冇鞋着唱到神不守舍。」他又戥Shirley只開一場騷不值:「佢嘅才華唔只係咁o既,所以靠你哋將今晚見到o既嘢傳開去,話畀全世界知:唔睇就笨啦!」他以Shirley兒子生父話題開玩笑:「聽講唱完之後你就移民,我都唔知你諗乜,係咪dry呀?不如去識多個,唔同宗教都得,唔使一定踩住波車(有傳兒子生父是寧波車)嚟嘛,(曾)志偉飲醉酒成日講(個仔)係佢嘅。」Shirley即說:「梗係假啦!」校長續笑說:「似我多啲,講笑咋!」

數度落淚憶亡母

另外,當Shirley唱到《一首獨唱的歌》等多首金曲時感動流淚,然後請出好友周慧敏獻唱。Shirley之後忍不住落淚憶亡母:「希望演唱會可以送畀媽咪,佢離世令我有所領悟,喺媽咪人生最後嘅階段,係我最認識佢嘅時候,希望大家珍惜身邊所有人。」隨即哼出自己作曲但未有填詞的處女作,最後以《難得有情人》作結。騷後她換上低胸裙現身祝酒儀式,講到跌倒一事,她表示腰痛及右膝擦損:「叉錯腳,可能開心得滯。(校長幫你挽鞋?)唔係幾好意思。」問到騷後可會退出樂壇?她說:「唔知,觀眾睇得開心就得,我又未至於無定向風到咁,唔想做吓停吓,可能遲啲會出一隻半隻單曲。」

文:音樂組 

攝:黎志輝