黃宗澤教金剛：唔好一嚟除人啲衫

黃：黃宗澤

金：金剛

哎吔兄弟溝女高手

Bosco和金剛首次合作拍電影，化身哎吔兄弟放笑彈，二人笑稱每次見面都雞啄唔斷傾心事。金剛大爆與日籍索模Jun「了解中」的Bosco溝女技巧，更向他教路做生意。他更抵死地自稱一點就明，令慘被出賣的Bosco頓時哭笑不得！

黃：好可惜戲外我哋都忙，好難遇到對方。

金：但我哋一遇到就會傾心事同秘密。生意上你仲教我好多嘢，因為你經驗多過我，會教我點做同教我賺錢。好簡單，我想開食店嘅話，第一夢想係賺錢。但你就驚我淨係有夢想，賺唔到錢！因為第一次搞生意有好多諗法，但多諗法唔一定好。

黃：冇教你呀，係分享經驗啫！

金：你同我講要一樣一樣嚟，唔好咁心急。就好似對女仔咁要一步一步嚟，唔好一嚟就除晒人哋啲衫！又係喎，你又講得啱喎！你咁樣比喻我即刻聽得明喇。即係追女仔首先要拖咗手先，跟住第二步再慢慢攬吓先，之後再錫吓先，跟住再一齊……再講落去出到街嘅咩？

黃：跟住下一步咪再食飯先囉，哈哈！

金：係囉，你就係會咁同我分享好多做生意嘅嘢。

飲食行家互笠高帽

本身經營蠔吧的Bosco與即將開設咖啡店的金剛均進軍飲食界，自然啱嘴形。兩人互笠高帽之餘，更希望夾份搞生意。

「黃金」組合自動波擺甫士，被「打」的金剛一臉欲拒還迎。	胸襲金剛的黃宗澤反而露出趣怪表情。	金剛笑認鹹濕，但絕不下流。

黃：大家會坐低分享同討論吓創業要做咩嘢。如果有機會，或者有商機都可以諗吓夾份搞生意。

金：安排緊，呢啲唔係話做就做，好多嘢要計劃o架。

黃：大家算係行家，但飲食好難做，好花時間同心機。

金：因為你嗰啲太高級喇，賣生蠔同牛扒喎！

黃：你賣咖啡豆都好高學問o架，仲有甜品呢。

金：唔好咁客氣啦你！

自認鹹濕唔敢亂望

兩位「老闆」傾完生意，即講起大家雖然戲路不同，但經常與不同靚女演對手戲，艷福不淺。但二人坦言艷福背後是一額汗，就算靚女晒身材都唔敢眼望望。

黃宗澤以追女仔來比喻做生意，又幾有道理喎！

放大圖片

黃：我今次拍警匪片做個好警察，但角色本身冇優點，鹹濕、賤格又粗魯！拍檔方皓玟開場時會晒身材，但我為咗拍戲要做嗰吓反應，叫我望其實唔敢望o架！男人係鹹濕啫，但你都做唔出o架 嘛！其實好尷尬嘅，人哋都係女演員，我會事先同佢講，我一陣會咁望實你，講聲唔好意思。

金：我覺得就算見到幾養眼都係工作狀態，都唔會幾興奮。你又驚睇多咗會唔好意思。男人風流，但係唔下流嘛！不過講到你角色鹹濕，其實老實講，都似你真人性格，哈哈！講笑咋，以我識嘅你唔係咁嘅人，我覺得你喺呢套戲做番另一個自己，係做另一個人先啱，本身以為你淨係做到靚仔樣，估唔到效果咁，令我佩服。

制服誘惑靚過女人

表現合拍的他們渴望再合作，二人更爆笑提議合演情侶，金剛又大讚Bosco「男扮女裝」都夠晒省鏡！

金：我哋演情侶都得呀，你扮女裝好靚o架！真係靚過好多女仔呀，真係o架！

黃：我真係靚到咁咩？咁我可以朝呢個方向發展。我扮女人都喺你心目中靚過好多女仔，咁大家都明白金剛嘅口味係咩啦！今次套戲我着高踭鞋同絲襪扮空姐、女警同女僕，仲被人讚我隻腳好靚。

金：我夠扮過女人啦，都靚o架！

HeHe「黃金」組合

後記：Bosco及金剛呢對「難兄難弟」只要一相遇就笑料百出，二人影相期間扮成超模鬥chok，結果金剛以騎呢S形甫士擊敗Bosco，場面爆笑。其後二人一度扮正經影靚仔相，當他們互啤對方鬥氣場時，Bosco竟突然捉着金剛左手獻上深情一吻，HeHe味極濃，連小記都冇眼睇呀！

筆錄：影視組

攝：林蔚恩

場地：metroplex@Emax

黃宗澤髮型及化妝：Kel Fung HH.hair.nail、Cyrus lee

黃宗澤服裝：D-mop