郭慶彬想搞紅館「襯衫騷」

著名形象指導郭慶彬（Ricky）日前為Brunello Cucinelli的VIP教襯衫及講解來季潮流，他表示這是他的第128場，並笑言自己似「風水佬」為女士指點迷津：「其實所有女性都會覺得自己唔完美，佢哋經常會問三個問題，就係着咩顏色？着咩類型？同埋興啲乜？無論係透過Facebook、Instagram都好多人問我。目標係喺紅館教襯衫，已經有投資者搵我，初時都有少少抗拒，但諗諗吓覺得幾好玩，好似一個騷咁，請啲歌手着住靚衫唱歌，到廁所位我就出場講吓啲衫，我諗過請外國嘅設計師同超模過嚟，應該呢兩年會成事。」