羅霖被偷橋學精避奸人
藝人羅霖、筱靖等昨日出席活動，最近忙於自己生意的羅霖，卻自爆近日遇上不快事，被對方偷橋：「舊年同一個品牌傾合作，都開過好多次會，只差未簽約，點知一星期前對方以唔方便同未必適合大家合作為理由拒絕咗我，之後仲畀我發現佢私下用我啲idea同橋，連廣告概念都一樣，產品仲已經上埋架。」
無奈但不會追究
雖然她曾致電向對方問原因，但對方卻反指她不是，令其感無奈，不過羅霖坦言未有為此事嬲怒，只是經一事長一智，下次會先與對方簽約再詳談：「啲人咁奸，合作後都一定好麻煩，冇諗過喺呢行咁多年會畀人呃，不過多個朋友好過多個敵人，咁我又唔會同佢反面，亦唔會追究，但會避開佢。」
筱靖認唔夠出名
而筱靖則表示離開亞視後發展不俗，除了將為有線拍攝資訊節目，又有婚紗騷工作，自己也有餐廳生意及工作室，收入不成問題，談到不少舊同事也獲無綫接見傾合作，問到可有向她招手？筱靖笑謂：「冇呀！我知名度未夠，佢哋係前輩，我仲差少少年資，有機會當然想，但覺得佢哋會鍾意知名度高番少少嘅藝人，所以我會努力。」
文：影視組