盧冠廷撼贏油王另類招數冧老婆
資深歌手盧冠廷將於六月假紅館舉行《Beyond Imagination》演唱會，日前他接受電台訪問，大談跟太太唐書琛的相識經過。70年代他在美國音樂比賽勝出，回港發展，有次他在酒店演出，邂逅在酒店任職高層的太太，他表示當年太太條件好：「有中東油王或者娛樂界紅人送花、送禮物畀佢，我就惟有用第二招，扮冇嘢，令佢覺得『點解人哋當我係寶，你就當我係草？』咁就中咗我招，成為我嘅太太！」
他自認不浪漫，更沒有求婚：「我攞美國護照，話佢知唔可以逾期居留，除非結咗婚，所以我哋就結婚，係順便！」他與太太相戀四十年，兩人經常出雙入對，對此他分享相處之道是要「永遠認低威」：「無論太太做錯咩，你都要『咕』一聲吞咗佢！」