坤坤脫貧升呢做400樓業主

人紅莫問出處，單親家庭長大的坤坤承認母親曾靠攞綜援養大他兩兄妺，與家人蝸居樂富公屋。自坤坤年初橫掃各大音樂頒獎禮後，人氣爆燈，過去半年憑廣告、電影及商演勁賺七位數！一直希望母親和妹妹可以住得更好的坤坤有感近月樓市跌，終於儲夠「百萬彈藥」「上車」，據知在樂富區公屋長大的坤坤，正物色同區的四、五百萬二手私樓單位，一於脫貧升呢做業主！

身價「翻四番」

坤坤有望「上車」可謂配合天時地利，短短半年，他成了廣告界新寵，先後拍了面膜、靈芝、洗頭水及茶餐廳廣告，尚有兩個廣告在籌備中，加上周六、日跑商演，有時撞檔期分身不暇，令至少有六位數酬勞「白白流走」。據知坤坤未紅時廣告薪酬近五位數有交易，現時身價已經「翻四番」，就連電影客串亦達六位數收入，相當和味！至於讓坤坤達成業主夢的唱片公司星娛樂都很出力，據聞除了避孕套及壯陽藥不讓坤坤做代言人外，其他均抱開放態度，就算女性用品廣告都照拍。

M巾廣告照殺

昨日本報記者求證坤坤半年身家變百萬？他笑說：「嘩！唔知呢，有打簿仔，係見到有筆錢嘅。（話你儲夠首期買樓？）係有睇過樓盤，想買番住緊呢區同屋企人住，主要都係黃大仙區，天馬苑、翠竹花園呢啲，淘大花園都有睇。（目標幾錢？）四百幾萬。（換埋車？）都想換，因為嗰架成日有意外，但唔係換貴車，諗住買架十萬蚊樓下用嚟代步。」講到星娛樂讓他接M巾廣告，他坦言不介意，更試過幫妹妹及女朋友買M巾，不覺尷尬。問到哪位星級女友曾獲此待遇？他抵死笑說：「唔記得啦！我咁多『女友』！」

以坤坤的心水屋苑來說，位於黃大仙區的天馬苑屬抵買樓盤之一，如果不嫌屋仔細，約338至415實呎的單位最平，約320萬有交易；同區的翠竹花園單位較大，不過約500實呎的單位叫價約500至545萬，坤坤要買就要再努力儲錢；九龍灣的淘大花園是大型屋苑，勝在交通方便，如果要450萬以下單位，只有285至390實呎選擇。其實坤坤仍有其他選擇，例如鄰近港鐵站的龍蟠苑和豪苑，兩個屋苑300多實呎的單位都是約400萬。

文：音樂組