徐子珊賣弄性感被趕返屋企
徐子珊昨晚出席法國時尚配飾品牌活動，被預告會性感火辣現身，她到場時穿上火紅色貼身晚裝裙，但性感欠奉，她說：「性感見仁見智，我都唔明點解啲人會咁形容我，性感兩個字唔應該喺我身上，由細到大都覺得自己係男仔頭，自己身材絕唔係性感指標。」
見男友變小鳥依人
子珊謂心中性感女神是吳家麗：「佢嘅女人味係舉手投足都散發咗出嚟。（你可以練吓？）我練唔到，我曾經同曾志偉拍套戲，畀佢話我唔sexy，佢要求我做一個性感撥頭髮嘅動作，我做極都唔滿意，NG咗四、五次，志偉知我都係做唔到，叫我返屋企練，第日再拍。我返去有練到，都係好啲咋。（有冇男友覺得你唔夠性感女人味？）如果佢哋咁講，我一腳伸開佢。我對住男友都小鳥依人啲，但我覺得自己似細路女多過女人。」記者笑她可做其歌曲《Hit me》的招牌扭pat動作，她說：「我唔敢再做呢個動作，自己睇番都想笑，但有唔少客要求我唱呢首歌。」
陳嘉桓登「陸」拍古裝
同場陳嘉桓身穿露背連身裙到場，透露剛在大陸拍完網絡劇回港，最開心全程用普通話拍攝：「因為我由細到大都有學普通話，套劇可用真聲唔使配音。今次係我首次拍古裝，原來古裝戴頭套戴十幾個鐘，個頭會好痛。」她指現時巿道不景氣，有工開已好開心，價錢其次，角色最重要，望藉此打入大陸巿場。
文：名人組